ആലപ്പുഴ: കായംകുളത്തും കൊട്ടാരക്കരയിലും ഭക്ഷ്യ വിഷബാധയെത്തുടര്‍ന്ന് 24 വിദ്യാര്‍ഥികള്‍ ആശുപത്രിയില്‍ പ്രവേശിപ്പിച്ചു. ഇരുപതോളം കുട്ടികള്‍ക്കാണ് കായംകുളത്ത് ഭക്ഷ്യവിഷബാധയുണ്ടായിരിക്കുന്നത്. കായംകുളം ടൗണ്‍ ഗവണ്‍മെന്റ് യു.പി സ്‌കൂളിലെ വിദ്യാര്‍ഥികളാണിവര്‍. കൊട്ടാരക്കരയിലെ നാല് അങ്കണവാടി വിദ്യാര്‍ഥികളെയാണ് ആശുപത്രിയിലാക്കിയത്. ആരുടെയും നില ഗുരുതരമല്ലെന്ന് ആശുപത്രി അധികൃതര്‍ അറിയിച്ചു. സംഭവത്തില്‍ ആരോഗ്യവകുപ്പും ഭക്ഷ്യസുരക്ഷാ വകുപ്പും അന്വേഷണം ആരംഭിച്ചു.
കായംകുളത്തെ സ്‌കൂളില്‍ നിന്ന് ഇന്നലെ വിളമ്പിയ ചോറും സാമ്പാറുമാവാം വില്ലനായതെന്നാണ് സംശയം. കുട്ടികളെ താലൂക്ക് ആശുപത്രിയില്‍ പ്രവേശിപ്പിച്ചു.
ഇന്നലെ രാത്രി അസ്വസ്ഥത അനുഭവപ്പെട്ടതോടെ ചികിത്സ തേടിയിരുന്നു. തുടര്‍ന്ന് വീട്ടിലേക്ക് മടങ്ങിയ കുട്ടികള്‍ക്ക് ഇന്ന് രാവിലെ വീണ്ടും വയറുവേദനയും ക്ഷീണവും അനുഭവപ്പെടുകയായിരുന്നു.

ഛര്‍ദ്ദിയും വയറിളക്കവും അനുഭവപ്പെട്ടതോടെയാണ് കൊട്ടാരക്കരയിലെ അങ്കണ്‍വാടിയിലെ വിദ്യാര്‍ഥികളെ രക്ഷിതാക്കളെത്തി ആശുപത്രിയിലേക്ക് മാറ്റിയത്. അങ്കണവാടിയില്‍ നിന്ന് വിതരണം ചെയ്ത ഭക്ഷണം കഴിച്ചതിനെ തുടര്‍ന്നാണ് ഭക്ഷ്യവിഷബാധയുണ്ടായതെന്നാണ് ബന്ധുക്കള്‍ ആരോപിക്കുന്നത്.