കോഴിക്കോട്: ലക്ഷദ്വീപ് സന്ദര്‍ശിക്കാന്‍ അനുമതി നല്‍കണമെന്നാവശ്യപ്പെട്ട് കേരളത്തില്‍ നിന്നുള്ള ഇടത് എം.പിമാര്‍ വീണ്ടും അഡ്മിനിസ്‌ട്രേറ്റര്‍ക്കും കവരത്തി എ.ഡി.എമ്മിനും കത്ത് നല്‍കി.

എം.പിമാരായ എളമരം കരീം, ബിനോയ് വിശ്വം, തോമസ് ചാഴിക്കാടന്‍, എം.വി ശ്രേയാംസ് കുമാര്‍, ഡോ. വി ശിവദാസന്‍, കെ.സോമപ്രസാദ്, എ.എം ആരിഫ്, ജോണ്‍ ബ്രിട്ടാസ് എന്നിവരാണ് ലക്ഷദ്വീപ് സന്ദര്‍ശിക്കാന്‍ അനുമതി തേടിയത്. ദ്വീപിലെ നിലവിലെ സാഹചര്യം വിലയിരുത്താനും പുതിയ അഡ്മിനിസ്‌ട്രേറ്റര്‍ക്ക് കീഴില്‍ നടപ്പിലാക്കിയ പരിഷ്‌കാരങ്ങളും നയങ്ങളും ദ്വീപ് നിവാസികളെ ഏത് രീതിയിലാണ് ബാധിച്ചിരിക്കുന്നതെന്ന് നേരിട്ട് മനസിലാക്കുകയാണ് യാത്രയുടെ ഉദ്ദേശ്യമെന്നും സി.പി.എം രാജ്യസഭാ കക്ഷി നേതാവ് എളമരം കരീം പറഞ്ഞു. രാഷ്ട്രപതിക്കും പ്രധാനമന്ത്രിക്കും വസ്തുതാന്വേഷണ റിപ്പോര്‍ട്ട് സമര്‍പ്പിക്കും.
അനുമതി ലഭിച്ചില്ലെങ്കില്‍ ശക്തമായ സമരപരിപാടികളോടൊപ്പം നിയമ നടപടികളും സ്വീകരിക്കാന്‍ ആലോചിക്കുന്നതായും ഇടത് എം.പിമാര്‍ അറിയിച്ചു.