തിരുവനന്തപുരം
കേരള മീഡിയ അക്കാദമിയുടെ 2020ലെ ആറ് മാധ്യമ അവാർഡുകൾ ചെയർമാൻ ആർ.എസ് ബാബു പ്രഖ്യാപിച്ചു. 25,000 രൂപയും പ്രശസ്തിപത്രവും ശിൽപവുമാണ് പുരസ്‌കാരം. മികച്ച ഹ്യൂമൻ ഇന്ററസ്റ്റ് സ്റ്റോറിക്കുള്ള എൻ.എൻ സത്യവ്രതൻ അവാർഡിന് റെജി ജോസഫും (ദീപിക), മികച്ച എഡിറ്റോറിയലിനുള്ള വി. കരുണാകരൻ നമ്പ്യാർ അവാർഡിന് മനോഹരനും (ദേശാഭിമാനി), മികച്ച അന്വേഷണാത്മക റിപ്പോർട്ടിനുള്ള ചൊവ്വര പരമേശ്വരൻ അവാർഡിന് വി.പി നിസാറും (മംഗളം) അർഹരായി.
മികച്ച പ്രാദേശിക പത്രപ്രവർത്തനത്തിനുള്ള ഡോ. മൂർക്കന്നൂർ നാരായണൻ അവാർഡ് സോജൻ വാളൂരാനും (മാതൃഭൂമി), മികച്ച ന്യൂസ് ഫോട്ടോഗ്രഫിക്കുള്ള മീഡിയ അക്കാദമി അവാർഡ് വിമിത് ഷാലിനും (മെട്രോ വാർത്ത) ലഭിച്ചു. ദ് ഹിന്ദു വിന്റെ ഫോട്ടോ ഗ്രാഫർ തുളസി കക്കാട്ട് സ്‌പെഷൽ ജൂറി പുരസ്‌കാരത്തിന് അർഹനായി. മികച്ച ദൃശ്യമാധ്യമ പ്രവർത്തനത്തിനുള്ള കേരള മീഡിയ അക്കാദമി അവാർഡ് ഏഷ്യാനെറ്റിലെ ആർ.പി വിനോദിന് ലഭിച്ചു. ജൂലൈയിൽ അവാർഡുകൾ സമ്മാനിക്കും.
രഘുറായിക്ക് വേള്‍ഡ് പ്രസ് ഫോട്ടോഗ്രഫി പ്രൈസ്
തിരുവനന്തപുരം
ലോകപ്രശസ്ത ഫോട്ടോഗ്രാഫര്‍ രഘുറായിക്ക് കേരള മീഡിയ അക്കാദമിയുടെ വേള്‍ഡ് പ്രസ് ഫോട്ടോഗ്രഫി പ്രൈസ്. ഒരു ലക്ഷം രൂപയും പ്രശസ്തിപത്രവും ശിൽപവുമാണ് സമ്മാനിക്കുക.
ഭോപാല്‍ വിഷവാതക ദുരന്തത്തിന്റെ ഭീതിദമായ മുഖങ്ങളും മദര്‍ തെരേസയുടെ കാരുണ്യത്തിന്റെ ഭാവങ്ങളും ഇന്ത്യന്‍ ഭരണചക്രം തിരിച്ചവരുടെ അപൂര്‍വ മുഖങ്ങളും ജനമനസില്‍ ഇടംനേടിയത് രഘുറായിയുടെ കാമറക്കണ്ണുകളിലൂടെയാണ്. 1972ല്‍ രാജ്യം പത്മശ്രീ നല്‍കി ആദരിച്ചു.
കേരളത്തിന്റെ വലിയ ബഹുമതിക്ക് താന്‍ അര്‍ഹനായതില്‍ രഘുറായ് സന്തോഷം അറിയിച്ചു. ഇപ്പോള്‍ ഫോട്ടോപ്രദര്‍ശനവുമായി അമേരിക്ക ഉള്‍പ്പെടെയുള്ള രാജ്യങ്ങളില്‍ പര്യടനത്തിലാണ് ഇദ്ദേഹം.