സുൽത്താൻബത്തേരി
വന്യജീവി സങ്കേതത്തിനു ചുറ്റും ഒരു കിലോമീറ്റർ ദൂരപരിധിയിൽ ബഫർ സോൺ(പരിസ്ഥിതി ലോല മേഖല) നിർബന്ധമാക്കിയ സുപ്രിം കോടതി ഉത്തരവിനെതിരേ സുൽത്താൻബത്തേരി നഗരസഭയിൽ പ്രമേയം.
ഉത്തരവ് ജനങ്ങളെ കുടിയൊഴിയാൻ നിർബന്ധിതരാക്കും. വിഷയവുമായി ബന്ധപ്പെട്ട് വിളിച്ചുചേർത്ത അടിയന്തര കൗൺസിൽ യോഗമാണ് ഉത്തരവിനെതിരേ പ്രമേയം അവതരിപ്പിച്ചത്.
ഉത്തരവ് സുൽത്താൻ ബത്തേരി നഗരസഭയെ പ്രതികൂലമായ ബാധിക്കും. ഇന്നത്തെ ബഫർസോൺ നാളത്തെ റിസർവ് ഫോറസ്റ്റായിരിക്കുമെന്നും ബഫർസോണിൽ നടപ്പാക്കുന്ന നിയമങ്ങളും നിയന്ത്രണങ്ങളും മനുഷ്യനെ കുടിയൊഴിയാൻ നിർബന്ധിതരാക്കുമെന്നും പ്രമേയത്തിൽ ചൂണ്ടിക്കാട്ടി.
ജനങ്ങളുടെ ആവാസ വ്യവസ്ഥയെ തകിടംമറിക്കുന്നതാണ് കോടതി വിധി. ജനങ്ങളെ ഒഴിവാക്കികൊണ്ടുള്ള പരിസ്ഥിതി സംരക്ഷണം അപ്രായോഗികമാണ്. സംസ്ഥാനത്തെ അതിവേഗം വളരുന്ന സുൽത്താൻബത്തേരിയുടെ വികസനത്തെ തടയിടുന്നതാണ് കോടതി വിധി. നഗരസഭയുടെ ജനസംഖയിൽ 26 ശതമാനവും ഗോത്രവർഗക്കാരാണ്.
ഇവരെ ബാധിക്കുന്നതും ജനജീവിതം പ്രതിസന്ധിയിലാക്കുന്നതുമായ ഉത്തരവ് പിൻവലിക്കണമെന്നും നഗരസഭ പ്രമേയത്തിൽ ആവശ്യപ്പെട്ടു.