പ്രത്യേക ലേഖകൻ
തിരുവനന്തപുരം
പൊതുജനങ്ങൾക്ക് ആയുധ പരിശീലനം നൽകാനൊരുങ്ങി പൊലിസ്. നിലവിൽ തോക്ക് ലൈസൻസുള്ളവർക്കും അതിനായി അപേക്ഷിച്ചവർക്കുമാണ് പരിശീലനം നൽകുക. ഇതു സംബന്ധിച്ച സംസ്ഥാന പൊലിസ് മേധാവി അനിൽകാന്ത് ഉത്തരവിറക്കി. പരിശീലനത്തിന് ഫീസ് ഏർപ്പെടുത്തും. ഇതിനായി പ്രത്യേക സമിതിയും സിലബസും തയാറാക്കിയിട്ടുണ്ട്. നിലവിൽ സംസ്ഥാനത്ത് പൊലിസ് അംഗങ്ങൾക്കു മാത്രമാണ് ആയുധ പരിശീലനം ലഭിക്കുന്നത്.

ലൈസൻസുള്ളവർക്ക് പോലും എങ്ങനെ ആയുധം ഉപയോഗിക്കണം എന്ന കാര്യത്തിൽ പരിശീലനം ലഭിക്കാത്ത സാഹചര്യമാണ് സംസ്ഥാനത്തുള്ളതെന്നും ഇതിനു പരിഹാരം വേണമെന്നും ചൂണ്ടിക്കാട്ടി ചിലർ ഹൈക്കോടതിയെ സമീപിച്ചിരുന്നു. തുടർന്ന് ഹൈക്കോടതി പൊലിസിന് ഇതു സംബന്ധിച്ചു നിർദേശം നൽകിയതിനു പിന്നാലെയാണ് ഡി.ജി.പി ഉത്തരവിറക്കിയത്. ലൈസൻസ് എടുത്ത് തോക്കുകൾ കൊണ്ടുനടക്കുന്നവർക്ക് എങ്ങനെ വെടിവയ്ക്കണമെന്ന പരിശീലനം ലഭിച്ചിട്ടില്ല. പലയിടങ്ങളിലും പ്രവർത്തിക്കുന്ന റൈഫിൾ ക്ലബുകളിൽനിന്ന് ഫയറിങ് പരിശീലനം നേടാമെങ്കിലും ബുള്ളറ്റ് ഉപയോഗിക്കാൻ കഴിയില്ല. പകരം എയർ ഗണ്ണിലുപയോഗിക്കുന്ന പെല്ലറ്റാണ് ഉപയോഗിക്കുന്നത്. മാത്രമല്ല, ഇതു സംബന്ധിച്ച് കൃത്യമായ പരിശോധനയും സ്റ്റേഷനുകളിൽ നടക്കുന്നില്ല.
നിലവിൽ തോക്ക് ലൈസൻസ് ഉള്ളവർക്ക് പൊലിസിന്റെ ക്ലിയറൻസ് സർട്ടിഫിക്കറ്റ്, ആയുധ ലൈസൻസ്, ആധാർ, ഫിറ്റ്‌നസ് സർട്ടിഫിക്കറ്റ് എന്നിവ ഹാജരാക്കി അപേക്ഷ നൽകുന്നവർക്ക് പരിശീലനം നൽകും. പുതുതായി ലൈസൻസിന് അപേക്ഷിക്കുന്നവർക്ക് പരിശീലനം നിർബന്ധമാക്കും. ഇവർ അപേക്ഷ സമർപ്പിച്ചതിനു ശേഷം പരിശീലനത്തിൽ പങ്കെടുക്കണം. അവിടെ നിന്നു ലഭിക്കുന്ന സർട്ടിഫിക്കറ്റ് ഹാജരാക്കിയാൽ മാത്രമേ ലൈസൻസ് അനുവദിക്കൂ.

മൂന്നു മാസത്തെ ഇടവേളകളിൽ ബറ്റാലിയനുകളിലാണ് പരിശീലനം നൽകാൻ ആലോചിക്കുന്നത്. ഡെപ്യൂട്ടി കമൻഡാന്റിനെ ഇതിന്റെ കമ്മിറ്റി ചെയർമാനായി തീരുമാനിച്ചു. 13 ദിവസമാണ് കോഴ്‌സിന്റെ കാലാവധി. പരിശീലന കേന്ദ്രമായി തീരുമാനിച്ചിട്ടുള്ളത് കെപ്പയിലാണ്. പരിശീലന സമയത്ത് തിരകളുടെ പണം വ്യക്തികൾ നൽകണം. അപേക്ഷകന് 21 വയസ് പൂർത്തിയായിരിക്കണം.