ന്യൂയോർക്ക്
അർബുദം പൂർണമായും ഭേദമാക്കുന്ന മരുന്ന് കണ്ടെത്തിയതായി റിപ്പോർട്ട്. മലാശയ അർബുദം ബാധിച്ച 18 രോഗികളിൽ നടത്തിയ മരുന്നിന്റെ പരീക്ഷണം പൂർണമായി വിജയിച്ചതായി ന്യൂയോർക്ക് ടൈംസ് ആണ് റിപ്പോർട്ട് ചെയ്തു.

ന്യൂയോർക്കിലെ മെമ്മോറിയൽ സ്ലൊവാൻ കെറ്ററിങ് കാൻസർ സെന്ററിൽ നടത്തിയ പരീക്ഷണത്തിൽ 'ഡൊസ്റ്റർലിമാബ്' എന്ന മരുന്ന് അർബുദ കോശങ്ങളെ പൂർണമായി ഇല്ലാതാക്കിയെന്ന് റിപ്പോർട്ടിൽ പറയുന്നു. അർബുദ വളർച്ച തുടക്കത്തിൽ തന്നെ കണ്ടെത്തിയതും മറ്റ് അവയവങ്ങളിലേക്ക് പടർന്നിട്ടില്ലാത്തതുമായ രോഗികളിലായിരുന്നു പരീക്ഷണം.
നേരത്തേ കീമോതെറപ്പിയും റേഡിയേഷനും ഉൾപ്പെടെയുള്ള ചികിത്സ നടത്തിയിട്ടും ഫലം ലഭിക്കാത്ത ഒരേ തരത്തിലുള്ള 18 അർബുദ രോഗികൾക്ക് മൂന്നാഴ്ചയിൽ ഒരിക്കൽ വീതം ആറുമാസത്തേക്ക് ഡൊസ്റ്റർലിമാബ് നൽകി. ആറുമാസം കഴിച്ചപ്പോൾ അർബുദ വളർച്ച പൂർണമായും ഇല്ലാതായി. അർബുദ നിർണയത്തിനുള്ള ടോമോഗ്രഫി, പെറ്റ് സ്‌കാൻ, എം.ആർ.ഐ സ്‌കാൻ ഉൾപ്പെടെ എല്ലാ പരിശോധനയിലും രോഗം പൂർണമായും മാറിയതായി കണ്ടെത്തിയെന്നും പാർശ്വഫലങ്ങളൊന്നും ഉണ്ടായില്ലെന്നും റിപ്പോർട്ട് വ്യക്തമാക്കി.

അർബുദ ചികിത്സയിൽ വിപ്ലവകരമായ മാറ്റത്തിന് വഴിതെളിക്കുന്ന കണ്ടെത്തലാണിതെന്ന് ഗവേഷകർ അഭിപ്രായപ്പെട്ടു.
ശരീരത്തിലെ ആന്റിബോഡികൾക്കു പകരമാകുന്ന തന്മാത്രകളാണ് ഈ മരുന്നിലുള്ളതെന്നു പരീക്ഷണത്തിനു നേതൃത്വം നൽകിയ ഡോ. ലൂയി എ.ഡയസ് ജൂനിയർ പറഞ്ഞു.