തിരുവനന്തപുരം: സംസ്ഥാന പൊലിസ് മേധാവിയെ തെരഞ്ഞെടുക്കുന്നതിനായി തയ്യാറാക്കിയ ഉദ്യോഗസ്ഥരുടെ പട്ടിക വെട്ടിച്ചുരുക്കി. കേന്ദ്ര നിര്‍ദ്ദേശത്തെ തുടര്‍ന്നാണ് നടപടി. പുതുക്കിയ പട്ടിക പൊതുഭരണവകുപ്പ് കേന്ദ്രത്തിന് കൈമാറി.

30 വര്‍ഷം സര്‍വ്വീസ് പൂര്‍ത്തിയാക്കാത്തവര്‍ ഇടം പിടിച്ചതിനെ തുടര്‍ന്ന് പട്ടിക കേന്ദ്രം മടക്കിയിരുന്നു. മൂന്ന് ഉദ്യോഗസ്ഥരെയാണ് ഒഴിവാക്കിയതെന്നാണ് സൂചന. നേരത്തെ 12 പേരുടെ പട്ടികയാണ് അയച്ചിരുന്നത്. പുതിയ പട്ടികയില്‍ ഒന്‍പത് പേരാണ് ഉള്ളതെന്നാണ് റിപ്പോര്‍ട്ട്.

30 വര്‍ഷം പൂര്‍ത്തിയാകാത്തവരുടെ പേരുകള്‍ ഉള്‍പ്പെട്ടതിനാലാണ് പട്ടിക കേന്ദ്രം തിരിച്ചയച്ചത്. തുടര്‍ന്ന് മൂന്ന് ഉദ്യോഗസ്ഥരെ ഒഴിവാക്കി പട്ടിക പുതുക്കുകയായിരുന്നു. 1991ഐപിഎസ് ബാച്ചിലുള്ള സഞ്ജീബ് കുമാര്‍ പട്‌ജോഷി, റവദ ചന്ദ്രശേഖര്‍ എന്നിവരെയാണ് ഒഴിവാക്കിയത്.പൊലിസ് അക്കാദമി ഡയറക്ടറും ട്രെയിംനിംഗ് മേധാവിയുമായ ഷെയ്ഖ് ദര്‍വേഷ് സാഹിബാണ് ഒഴിവാക്കിയ അടുത്തയാളെന്നും റിപ്പോര്‍ട്ടുകള്‍ പറയുന്നു.

അരുണ്‍ കുമാര്‍ സിന്‍ഹ, ടോമിന്‍ ജെ തച്ചങ്കരി, സുധേഷ് കുമാര്‍ അടക്കമുള്ളവര്‍ പുതിയ പട്ടികയിലുമുണ്ട്. ഇവരിലൊരാളാകും അടുത്ത പൊലിസ് മേധാവി എന്നാണ് പ്രതീക്ഷിക്കുന്നത്. യു.പി.എസ്.സിയുടെ തെരഞ്ഞെടുപ്പ് സമിതി യോഗം ചേര്‍ന്ന് മൂന്ന് പേരുടെ ഒരു അന്തിമ പട്ടിക തയ്യാറാക്കേണ്ടതുണ്ട്. ഈ അന്തിമ പട്ടിക കേരളത്തിന് കൈമാറും. ഇതില്‍ നിന്നാണ് ജൂണ്‍ അവസാനത്തോടെ കേരളം ഡി.ജി.പിയെ തെരഞ്ഞെടുക്കുക.

നിലവിലെ പൊലിസ് മേധാവി ലോക്‌നാഥ് ബെഹറ ജൂലൈ മുപ്പതിന് വിരമിക്കുകയാണ്.