തിരുവനന്തപുരം: റിയോ ഒളിംപിക്‌സിലെ വനിതാ മാരത്തണില്‍ ഇന്ത്യയെ പ്രതിനിധീകരിച്ച മലയാളി താരം ഒ.പി.ജയ്ഷ ട്രാക്കില്‍ തളര്‍ന്നു വീണെന്ന വാര്‍ത്ത ഞെട്ടലുണ്ടാക്കുന്നതായി മുഖ്യമന്ത്രി പിണറായി വിജയന്‍. ഫേസ്ബുക്ക് പോസ്റ്റിലൂടെയാണ് മുഖ്യമന്ത്രിയുടെ പ്രതികരണം.

മാരത്തണില്‍ എല്ലാ 2.5 കിലോമീറ്ററിലും ക്ഷീണം തീര്‍ക്കാനുള്ള അവസരമുണ്ട്. എന്നാല്‍ ഇന്ത്യയില്‍ നിന്ന് ഉത്തരവാദപ്പെട്ടവര്‍ ആരും തന്നെ വെള്ളമോ മറ്റ് ഊര്‍ജദായകമായ പാനീയങ്ങളോ താരങ്ങള്‍ക്ക് നല്‍കാന്‍ ഇല്ലായിരുന്നുവെന്നാണ് അറിയാന്‍ കഴിഞ്ഞത്. ഒളിംപിക്‌സ് സംഘാടകര്‍ എട്ട് കിലോമീറ്റര്‍ ഇടവിട്ട് ഒരുക്കിയ സജ്ജീകരണങ്ങള്‍ മാത്രമാണ് ഇന്ത്യയില്‍ നിന്നു പങ്കെടുത്ത ജയ്ഷയ്ക്കും കവിത റൗട്ടിനും ലഭ്യമായത്. മറ്റു രാജ്യങ്ങള്‍ തങ്ങളുടെ കായികതാരങ്ങള്‍ക്ക് എല്ലാ സൗകര്യങ്ങളും പരിഗണനകളും നല്‍കുമ്പോള്‍ ഇന്ത്യന്‍ താരങ്ങള്‍ ഇത്തരത്തിലുള്ള അവഗണനകള്‍ നേരിടേണ്ടി വരുന്നുവെന്നത് വളരെ വിഷമമുണ്ടാക്കുന്നുവെന്ന് മുഖ്യമന്ത്രി പറഞ്ഞു.

സിന്ധുവിന്റെയും സാക്ഷിയുടെയും ദീപയുടെയും നേട്ടങ്ങളില്‍ നമ്മള്‍ അഭിമാനം കൊള്ളുമ്പോഴും ഇന്ത്യന്‍ കായികരംഗത്ത് നിലനില്‍ക്കുന്ന പോരായ്മകളിലേക്ക് വിരല്‍ ചൂണ്ടുന്നതാണ് ഇത്തരം സംഭവങ്ങള്‍. 130 കോടി ജനങ്ങളും മനുഷ്യവിഭവശേഷിയും ഉള്ള ഒരു രാജ്യം അന്താരാഷ്ട്ര കായികമത്സരങ്ങളില്‍ പിന്നിലാകുന്നതിന് പ്രധാന കാരണം കായികതാരങ്ങളോടും കായികമേഖലയോടും കാണിക്കുന്ന ഇത്തരം അവഗണനകളാണ്. കായികതാരങ്ങളുടെ അടിസ്ഥാന സൗകര്യങ്ങളിലും ആരോഗ്യത്തിലും ശ്രദ്ധ പതിപ്പിക്കുന്ന കായികസംസ്‌കാരം നമ്മള്‍ രൂപപ്പെടുത്തിയെടുക്കേണ്ടതുണ്ടെന്നും പിണറായി പറഞ്ഞു.