കല്‍പ്പറ്റ: ജില്ലയിലെ നഗരങ്ങളും ഗ്രാമങ്ങളും തെരുവുനായകള്‍ കൈയടക്കുന്നു. പ്രാധാന ടൗണുകളായ കല്‍പ്പറ്റ, മാനന്തവാടി, സുല്‍ത്താന്‍ ബത്തേരി എന്നിവിടങ്ങളിലെല്ലാം തെരുവുനായ ശല്യം കാരണം ജനം പൊറുതി മുട്ടിയിരിക്കുകയാണ്. മാനന്തവാടിയില്‍ മിനി സിവില്‍ സ്റ്റേഷന്‍, കോടതി, ജില്ലാ ആശുപത്രി പരിസരം എന്നിവിടങ്ങളിലെല്ലാം തെരുവുനായകള്‍ കാല്‍നടയാത്രക്കാര്‍ക്ക് ഭീഷണിയാകുകയാണ്.
കല്‍പ്പറ്റയില്‍ ബൈപ്പാസ് ജംങ്ഷന്‍, സിവില്‍ സ്റ്റേഷന്‍, ജനറല്‍ ആശുപത്രി തുടങ്ങി നഗരത്തിലെ ഭൂരിഭാഗം പ്രദേശങ്ങളിലും തെരുവുനായകള്‍ കൂട്ടമായി തമ്പടിച്ചിരിക്കുകയാണ്. പഞ്ചായത്ത്, നഗരസഭാതലത്തില്‍ നായ്ക്കളെ വന്ധ്യംകരണം നടത്താനുള്ള നടപടികള്‍ ഇല്ലാത്തതതും ഇറച്ചി മാലിന്യങ്ങള്‍ ഉള്‍പെടെ റോഡരികില്‍ തള്ളുന്നതുമാണ് നായശല്യം ഇത്രത്തോളം വര്‍ധിക്കാന്‍ കാരണം.
 പ്രധാന ടൗണുകള്‍ക്ക് പുറമേ കാട്ടിക്കുളം, പനമരം, പുല്‍പ്പള്ളി, വെള്ളമുണ്ട, പടിഞ്ഞാറത്തറ, കമ്പളക്കാട്, മീനങ്ങാടി, അമ്പലവയല്‍, മേപ്പാടി, വൈത്തിരി, പൊഴുതന എന്നിവിടങ്ങളില്‍ നായ ശല്യം കാരണം വിദ്യാര്‍ഥികളുള്‍പെടെയുള്ളവര്‍ ദുരിതത്തിലായിരിക്കുകയാണ്.
രാത്രികാലങ്ങളിലാണ് നായശല്യം രൂക്ഷമാകുന്നത്. മാനന്തവാടി ജില്ലാ ആശുപത്രിക്ക് സമീപം നായകളുടെ ശല്യം രൂക്ഷമായതോടെ രോഗികളും ദുരിതത്തിലായിരിക്കുകയാണ്. ഇരുചക്ര വാഹനങ്ങളെ നായകള്‍ പിന്തുടരുന്നതും അപകടങ്ങള്‍ക്ക് കാരണമാകുന്നുണ്ട്. രാത്രികാലങ്ങളില്‍ കാല്‍നട യാത്രക്കാര്‍ തെരുവു നായകളുടെ ആക്രമണത്തിനിരയാകുന്നതും പതിവായിരിക്കുകയാണ്.
തദ്ദേശ സ്വയംഭരണ സ്ഥാപനങ്ങള്‍ വിവിധ പദ്ധതികളിലായി സ്ഥാപിച്ച തെരുവു വിളക്കുകള്‍ കത്താത്തതിനാല്‍ നായകളുടെ സാന്നിധ്യമറിയാതെയാണ് കാല്‍നട യാത്രക്കാര്‍ അപകടത്തില്‍പെടുന്നത്. കഴിഞ്ഞ ദിവസം മാനന്തവാടിയില്‍ ഒരാള്‍ക്ക് തെരുവുനായയുടെ ആക്രമണത്തില്‍ പരുക്കേറ്റിരുന്നു. ഇതോടെ തെരുനായകളുടെ എണ്ണപ്പെരുപ്പം നിയന്ത്രക്കാന്‍ അടിയന്തര നടപടിയുണ്ടാകണമെന്ന ആവശ്യം ശക്തമാകുകയാണ്.