മുംബൈ: മഹാരാഷ്ട്രയില്‍ ഒരു കുടുംബത്തിലെ ഒമ്പതു പേരെ മരിച്ച നിലയില്‍ കണ്ടെത്തിയ സംഭവത്തിന്റെ അന്വേഷണത്തില്‍ വഴിത്തിരിവ്. ഇവര്‍ കൂട്ട ആത്മഹത്യ ചെയ്തത് വട്ടിപ്പലിശക്കാരുടെ ഭീഷണിമൂലമാണെന്ന ആത്മഹത്യാക്കുറിപ്പാണ് കണ്ടു കിട്ടിയത്. ഇതോടെ പൊലിസ് അന്വേഷണം വ്യാപിപിക്കുകയും 25 പേര്‍ക്കെതിരേ കേസെടുക്കുകയും ചെയ്തിട്ടുണ്ട്. ഇവരില്‍ 13 പേരെ അറസ്റ്റ് ചെയ്തു.
കുടുംബം വലിയ തുക ഇവരില്‍ നിന്ന് പലിശക്കുവാങ്ങിയിരുന്നുവെന്നാണറിയുന്നത്. ഇത് തിരിച്ചടക്കാന്‍ കഴിയാതായതോടെയുണ്ടായ ഭീഷണിയാണ് കൂട്ട മരണത്തിലേക്കിവരെ എത്തിച്ചതെന്നാണ് വിവരം.
മുംബൈയില്‍ നിന്ന് 350 കിലോമീറ്റര്‍ അകലെയുള്ള സാംഗ്ലി ജില്ലയിലെ മഹൈസലിലെ വീട്ടിലെ സഹോദരങ്ങളുടെ കുടുംബാഗങ്ങളെയാണ് മരിച്ച നിലയില്‍ കണ്ടെത്തിയത്. തിങ്കളാഴ്ചയാണ് ഒമ്പതുപേരെ മരിച്ച നിലയില്‍ കണ്ടെത്തിയത്.

ഒമ്പത് മൃതദേഹങ്ങള്‍ കണ്ടെത്തി. മൂന്ന് മൃതദേഹങ്ങള്‍ ഒരിടത്തും ആറെണ്ണം വീട്ടിലെ മറ്റ് സ്ഥലങ്ങളില്‍ നിന്നുമാണ് കണ്ടെത്തിയത്' എന്ന് സാംഗ്ലി പൊലിസ് സൂപ്രണ്ട് ദീക്ഷിത് ഗെദം പറഞ്ഞു.