ജിദ്ദ: പരിശുദ്ധ ഹജ്ജിന് ഇനി ആഴ്ചകൾ മാത്രം ശേഷിക്കെ ഒരുക്കങ്ങൾ സജീവമാക്കി സഊദി ഭരണകൂടം. ജൂൺ അവസാനത്തോടെ നടക്കാനിരിക്കുന്ന ഹജ്ജ് കർമത്തിനായുള്ള ഒരുക്കങ്ങൾ വിലയിരുത്താൻ പുണ്യസ്ഥലമായ മദീനയിലെ ഉദ്യോഗസ്ഥർ യോഗം ചേർന്നു. മേഖലയിലെ ഹജ്ജ്, സന്ദർശന സമിതിയുടെ തലവനും മദീന ഗവർണറുമായ ഫൈസൽ ബിൻ സൽമാൻ രാജകുമാരൻ ഈ യോഗത്തിൽ അധ്യക്ഷനായി.

തീർത്ഥാടന കാലത്ത് സർക്കാർ ഏജൻസികൾ നടത്തേണ്ട പ്രവർത്തന പദ്ധതികൾ യോഗത്തിൽ ചർച്ച ചെയ്തു. ജൂൺ 26ന് ഹജ്ജ് കർമ്മങ്ങൾ ആരംഭിക്കുമെന്നാണ് പ്രതീക്ഷിക്കുന്നത്. എന്നാൽ ഇതിനും ദിവസങ്ങൾക്ക് മുൻപേ സീസൺ ആരംഭിക്കുകയും ലോകത്തിന്റെ എല്ലാ ദേശത്ത് നിന്നും ആളുകൾ എത്തുകയും ചെയ്യും.

ഈ വർഷം ഹജ്ജ് തീർത്ഥാടകരുടെ എണ്ണം കോവിഡിന് മുൻപുള്ള എണ്ണത്തിലേക്ക് തിരിച്ചെത്തും. അതിനാൽ തന്നെ ഏതാനും വർഷങ്ങൾക്ക് ശേഷം ഒരുക്കങ്ങൾ പൂർണതയിലേക്ക് എത്തേണ്ടതും വിപുലപ്പെടുത്തേണ്ടതും ഉണ്ട്.

ഹജ്ജ് സീസണിൽ 1.8 ദശലക്ഷം വിദേശ തീർത്ഥാടകരെ ഉൾകൊള്ളാൻ കഴിയുന്ന ഹജ്ജ് മന്ത്രാലയത്തിന് കീഴിലുള്ള മദീനയിലെ ഒരു ശാഖയുടെ പ്രവർത്തന പദ്ധതിയും യോഗം അവലോകനം ചെയ്തു. ഇസ്‌ലാമിന്റെ രണ്ടാമത്തെ പുണ്യസ്ഥലമായ പ്രവാചകന്റെ പള്ളിയുടെ പരിസരത്തുള്ള മദീന ഹോട്ടലുകളുടെ താമസ സൗകര്യവും യോഗം അവലോകനം ചെയ്തു.

അജണ്ടയിലെ മറ്റൊരു ഇനം മദീനയിലെ പ്രിൻസ് മുഹമ്മദ് ബിൻ അബ്ദുൽ അസീസ് വിമാനത്താവളത്തിനായുള്ള ഹജ്ജ് ഓപ്പറേഷൻ പ്ലാനായിരുന്നു. തീർത്ഥാടന വേളയിലെ വിമാനത്താവളത്തിലെ തിരക്ക് കഴിഞ്ഞ വർഷത്തെ അപേക്ഷിച്ച് 136 ശതമാനം വർധിക്കുമെന്നാണ് പ്രതീക്ഷിക്കുന്നത്.