വീണ്ടും സെഞ്ച്വറിയുമായി കോഹ്ലി; മികച്ച സ്‌കോറില്‍ ബംഗളൂരു

ബംഗളൂരു: ഇരുണ്ട് കൂടിയ കാര്‍മേഘങ്ങളെ സാക്ഷിയാക്കി കിങ് കോഹ്ലി സെഞ്ചുറിയുമായി അവതരിച്ചപ്പോള്‍ ഗുജറാത്തിന് മുന്നില്‍ 198 റണ്‍സ് വിജയ ലക്ഷ്യം കുറിച്ച് ആര്‍.സി.ബി. മഴമൂലം ഒരു മണിക്കൂര്‍ വൈകി ആരംഭിച്ച മത്സരത്തില്‍ തുടര്‍ച്ചയായ രണ്ടാം മത്സരത്തിലും ശതകം തികച്ചാണ് കോഹ്ലി ബാംഗ്ലൂരിന് മികച്ച സ്‌കോര്‍ സമ്മാനിച്ചത്. ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ ആര്‍.സി.ബി 20 ഓവറില്‍ അഞ്ച് വിക്കറ്റ് നഷ്ടത്തില്‍ 197 റണ്‍സാണ് സ്വന്തമാക്കിയത്. 61 പന്തില്‍ പുറത്താവാതെ 101 റണ്‍സായിരുന്നു കോഹ്ലിയുടെ സമ്പാദ്യം. 13 ഫോറുകളും ഒരു സിക്‌സുമടങ്ങുന്നതാണ് വിരാടിന്റെ ഇന്നിങ്‌സ്.

തകര്‍പ്പന്‍ തുടക്കമാണ് കോഹ്ലിയും ഡുപ്ലസിസും ചേര്‍ന്ന് ബാംഗ്ലൂരിന് നല്‍കിയത്. ആദ്യ വിക്കറ്റില്‍ ഇരുവരും ചേര്‍ന്ന് 7.1 ഓവറില്‍ 67 റണ്‍സെടുത്തു. 19 പന്തില്‍ 28 റണ്‍സെടുത്ത ഡുപ്ലസിയാണ് ആദ്യം പുറത്തായത്. ശേഷമെത്തിയ മാക്‌സ്വെല്‍ (5 പന്തില്‍ 11) തകര്‍പ്പനടികളുമായി തുടങ്ങിയെങ്കിലും പെട്ടന്ന് പുറത്തായി. തുടര്‍ന്നെത്തിയവരില്‍ ബ്രേസ്വെലും(16 പന്തില്‍ 26), അനുജ് റാവത്തും (15 പന്തില്‍ 23) വിരാടിന് മികച്ച പിന്തുണ നല്‍കിയതോടെയാണ് സ്‌കോര്‍ 197ലെത്തിയത്. മഹിപാല്‍ ലോംറര്‍(1), ദിനേശ് കാര്‍ത്തിക് (0) എന്നിവര്‍ നിരാശപ്പെടുത്തി. ഗുജറാത്തിനായി നൂര്‍ അഹമ്മദ് രണ്ട് വിക്കറ്റും മുഹമ്മദ് ഷമി, യാഷ് ദയാല്‍, റാഷിദ് ഖാന്‍, എന്നിവര്‍ ഓരോ വിക്കറ്റും വീഴ്ത്തി.