ജിദ്ദ: ഈ വര്‍ഷത്തെ വിശുദ്ധ ഹജ്ജ് കര്‍മ്മങ്ങള്‍ക്ക് ദിവസങ്ങള്‍ മാത്രം ബാക്കി നില്‍ക്കെ ഇതിനകം അഞ്ചു ലക്ഷത്തിലേറെ പേര്‍ ഇ ട്രാക്ക് വഴി ഹജിന് രജിസ്റ്റര്‍ ചെയ്തതായി ഹജ് ഉംറ മന്ത്രാലയം അറിയിച്ചു. സഊദിക്കകത്തുള്ള 150 ലേറെ രാജ്യങ്ങളില്‍നിന്നുള്ളവര്‍ ഹജിന് രജിസ്റ്റര്‍ ചെയ്തിട്ടുണ്ട്. ഇക്കൂട്ടത്തില്‍ 59 ശതമാനം പേര്‍ പുരുഷന്മാരും 41 ശതമാനം പേര്‍ സ്ത്രീകളുമാണ്. കഴിഞ്ഞ 13 മുതലാണ് ഹജ് രജിസ്‌ട്രേഷന്‍ ആരംഭിച്ചത്. 23ന് ബുധന്‍ രാത്രി പത്തു മണി വരെ രജിസ്‌ട്രേഷന് അവസരമുണ്ട്. പ്രാഥമിക രജിസ്‌ട്രേഷന്‍ നടത്തിയവരില്‍നിന്ന് നേരത്തെ പ്രഖ്യാപിച്ചിട്ടുള്ള വ്യവസ്ഥകള്‍ പൂര്‍ത്തീകരിച്ചിട്ടുള്ളവരെ വെള്ളിയാഴ്ച തെരഞ്ഞെടുക്കും. ഈ വര്‍ഷം 60,000 പേര്‍ക്കാണ് ഹജിന് അവസരമൊരുക്കുന്നത്. സ്വദേശികളും വിദേശികളുമായ സഊദിക്കകത്തുനിന്നുള്ള തീര്‍ഥാടകര്‍ക്കുമാത്രമായിരിക്കും അവസരം നല്‍കുകയെന്ന് ഹജ് ഉംറ മന്ത്രാലയം വ്യക്തമാക്കിയിട്ടുണ്ട്.

അതേ സമയം മിനായിലെ മുന്നൊരുക്കങ്ങള്‍ ഉപ ഹജ് - ഉംറ ഡെപ്യൂട്ടി മന്ത്രി ഡോ. അബ്ദുല്‍-ഫത്താഹ് ബിന്‍ സുലൈമാന്‍ മഷാത്ത് സന്ദര്‍ശിച്ചു.
ഈ വര്‍ഷം മൂന്ന് കാറ്റഗറികളിലാണ് ഹാജിമാരുടെ താമസ സൗകര്യങ്ങള്‍ ഒരുക്കിയിരിക്കുന്നത് .കാറ്റഗറി ഒന്നില്‍ ജംറയോട് ചേര്‍ന്നുള്ള മിന ടവറും , കാറ്റഗറി രണ്ടും മൂന്നും മിനായിലെ ടെന്റുകളിലുമാണ് ഹാജിമാര്‍ കഴിയേണ്ടത്. ശീതീകരിച്ച ടെന്റുകളിലെയും,ടവറിലെയും ഭക്ഷണം ഉള്‍പ്പെടയുള്ള മെനുകളും മന്ത്രാലയം പുറത്ത് വിട്ടിട്ടുണ്ട് .