മരട്: തുരുത്തിശ്ശേരി ക്ഷേത്രത്തിന് സമീപമുള്ള റോഡില്‍ സ്‌കൂള്‍ബസ്സിന് മുകളില്‍ വൈദ്യുതി പോസ്റ്റ് വീണു. ഈ സമയം പ്രദേശത്ത് പോസ്റ്റില്‍ മരം വീണ് വൈദ്യുതി ഇല്ലാതിരുന്നതുകൊണ്ട് വന്‍ ദുരന്തം ഒഴിവായി. ഏഴൂരിലെ സ്വകായ് സ്‌കൂള്‍ബസിന്റെ ഡ്രൈവറും ആയയും എട്ടുകുട്ടികളുമാണ് ബസിലുണ്ടായിരുന്നത്.

ഇന്ന് രാവിലെ 7.45 ഓടെയാണ് സംഭവം. താഴ്ന്നുകിടന്ന വൈദ്യുതി ലൈന്‍ ബസില്‍ കുരുങ്ങിയതാണ് പോസ്റ്റ് ഒടിഞ്ഞുവീഴാന്‍ കാരണം.

കരച്ചില്‍ കേട്ട് ഓടിക്കൂടിയ നാട്ടുകാരാണ് കുട്ടികളെ ബസ്സില്‍ നിന്നും ഇറക്കി സമീപത്തെ വീട്ടിലാക്കിയത്. ആര്‍ക്കും പരുക്കില്ല.

പോസ്റ്റ് അപകടാവസ്ഥിലായിട്ട് ദിവസങ്ങളായിരുന്നു. നിരവധി തവണ നാട്ടുകാര്‍ പരാതിയും പറഞ്ഞിരുന്നു. എന്നാല്‍ ആവശ്യമുള്ള നടപടി സ്വീകരിക്കാത്തതാണ് അപകടത്തിന് കാരണമായതെന്ന് നാട്ടുകാര്‍ പറഞ്ഞു.