ducati offering up to rs 4 lakh discounts on these motorcycles

ഇരുചക്ര വാഹന രംഗത്തെ ആഡംബര വാഹന നിര്‍മാതാക്കളില്‍ ശ്രദ്ധേയരാണ്
ഡ്യുക്കാട്ടി. വലിയ വിലയും അതിനൊത്ത ഫീച്ചേഴ്‌സും സ്വന്തമായുളള ഈ വാഹനം ഇരുചക്ര വാഹന പ്രേമികളുടെ സ്വപ്‌ന വാഹനങ്ങളിലൊന്നാണ്.
കരുത്തിലും സ്റ്റൈലിലും യാതൊരു വിട്ടുവീഴ്ചയുമില്ലാത്ത ഡ്യുക്കാട്ടി ഇന്ത്യന്‍ വിപണിയിലെത്തിയിട്ട് പത്ത് വര്‍ഷങ്ങള്‍ പൂര്‍ത്തിയാക്കുകയാണ്. ഇന്ത്യന്‍ വിപണിയിലെത്തിയതിന്റെ പത്താം വാര്‍ഷികം ആഘോഷിക്കുന്നതിന്റെ ഭാഗമായി വലിയ ഓഫറുകളാണ് ഡ്യുക്കാറ്റി വാങ്ങാന്‍ ആഗ്രഹിക്കുന്നവര്‍ക്കായി കമ്പനി പ്രഖ്യാപിച്ചിട്ടുളളത്.

തങ്ങളുടെ വാഹന ശേഖരത്തില്‍ നിന്നുളള തെരെഞ്ഞെടുത്ത മോഡലുകള്‍ക്കാണ് ഡ്യുക്കാറ്റി ഇളവുകള്‍ പ്രഖ്യാപിച്ചിട്ടുളളത്. ഡ്യുക്കാറ്റി മള്‍ട്ടിസ്ട്രാഡ വി4, ഡ്യുക്കാട്ടി സ്റ്റീറ്റ് ഫൈറ്റര്‍ വി4 തുടങ്ങിയ മോഡലുകള്‍ക്ക് വിലക്കിഴിവ് ബാധകമാണ്.
ഡ്യുക്കാട്ടി സ്ട്രീറ്റ്‌ഫൈറ്റര്‍ വി4 മോട്ടോര്‍ സൈക്കിളിന് 22.15 ലക്ഷം രൂപയാണ് ഷോറൂം വിലയുളളത്. പ്രസ്തുത വാഹനത്തിന് 4 ലക്ഷം രൂപ വരെ കമ്പനി ഇളവ് പ്രഖ്യാപിച്ചിട്ടുണ്ട്. ഇതിനൊപ്പം തന്നെ ഡ്യുക്കാട്ടി മള്‍ട്ടിസ്ട്രാഡ വി4 ബൈക്കിനും നാല് ലക്ഷം രൂപ വരെ ഇളവ് ലഭിക്കും.

18.10 ലക്ഷം രൂപവരെ ഷോറൂമില്‍ വിലയുളള ഡ്യുക്കാട്ടി സ്ട്രീറ്റ് ഫൈറ്റര്‍ വി2 മോഡല്‍ ബൈക്കിന് 2 ലക്ഷം രൂപവരെ ഇളവ് കമ്പനി നല്‍കുന്നുണ്ട്. ഇതിനൊപ്പം 16.05 ലക്ഷം രൂപ വരെ ഷോറൂം വിലയുളള ഡ്യുക്കാട്ടിയുടെ മള്‍ട്ടിസ്ട്രാഡ വി2 എന്ന മോഡലിനും രണ്ട് ലക്ഷം രൂപ വരെ കിഴിവ് ലഭിക്കും. 12.95 ലക്ഷം രൂപ ഷോറൂമില്‍ വില വരുന്ന ഡ്യുക്കാട്ടി മോണ്‍സ്റ്ററിനും ഇതേ വിലക്കിഴിവ് ബാധകമാണ്.

ഇത്തരത്തില്‍ വലിയ വിലക്കിഴിവുകള്‍ നല്‍കുന്നതിന് കമ്പനി ചില മാനദണ്ഡങ്ങള്‍ മുന്നോട്ട് വെച്ചിട്ടുണ്ട്. സ്‌റ്റോക്ക് അവസാനിക്കുന്നത് വരെ മാത്രമെ ഇത്തരം കിഴിവുകള്‍ ഉപഭോക്താക്കള്‍ക്ക് ലഭിക്കുകയുളളൂ. അതോടൊപ്പം കിഴിവ് ലഭിക്കുന്ന തുകക്ക് വാഹനത്തിന് ആക്‌സസറികള്‍ റൈഡിങ് കിറ്റുകള്‍ എന്നിവ വാങ്ങി ഉപയോഗിക്കാവുന്നതുമാണ്.

Content Highlights: ducati offering up to rs 4 lakh discounts on these motorcycles

പത്താം വാര്‍ഷികം ആഘോഷിക്കാനൊരുങ്ങി ഡ്യുക്കാട്ടി; 4 ലക്ഷം വരെ വിലക്കിഴിവ്