ദുബായ്: മിഡില്‍ ഈസ്‌റ്റേണ്‍, നോര്‍ത്താഫ്രിക്കന്‍, ഇന്ത്യന്‍ മേഖലകളിലെ ഏറ്റവും വലിയ റീടെയില്‍, ഹോസ്പിറ്റാലിറ്റി ഗ്രൂപ്പുകളിലൊന്നായ ലാന്റ്മാര്‍ക് ഗ്രൂപ്പിന്റെ സ്ഥാപകന്‍ മിക്കി ജഗ്തിയാനി (70) അന്തരിച്ചു.
ദുബായ് ആസ്ഥാനമായി പ്രവര്‍ത്തിച്ചു വരുന്ന ഗ്രൂപ് 1973ല്‍ ബഹ്‌റെനിലാണ് അദ്ദേഹം സ്ഥാപിച്ചത്. ആ ഒറ്റ ഷോപ്പില്‍ നിന്ന് ഇന്ന് ലോകോത്തരമായി ഗ്രൂപ് വളര്‍ന്നു വികസിച്ചു. ഈ വന്‍കിട ഗ്രൂപ്പിന്റെ അസാധാരണമായ പ്രയാണത്തില്‍ ജഗ്തിയാനി നേതൃശക്തിയായിരുന്നുവെന്ന് കമ്പനിയില്‍ നിന്നുള്ള പ്രസ്താവനയില്‍ പറഞ്ഞു.
5.2 ബില്യന്‍ ഡോളര്‍ ആസ്തിയുള്ള മിക്കി ജഗ്തിയാനി യുഎഇയിലെ മൂന്നാമത്തെ ഏറ്റവും വലിയ സമ്പന്നനാണ്. ഫോബ്‌സിന്റെ ഇക്കഴിഞ്ഞ ഏപ്രില്‍ മാസത്തിലെ സമ്പന്നരുടെ പട്ടികയില്‍ ലോകത്ത് 511-ാം സ്ഥാനം മിക്കി ജഗ്തിജയാനിക്കുണ്ട്. മാഗസിന്റെ വാര്‍ഷിക ലോക കോടിപതികളുടെ പട്ടികയില്‍ 37-ാം സ്ഥാനവുമുണ്ട്.
ലാന്റ്മാര്‍ക് ഗ്രൂപ്പിന് മിഡില്‍ ഈസ്‌റ്റേണ്‍, നോര്‍ത്താഫ്രിക്കന്‍, ഇന്ത്യന്‍, തെക്കു-കിഴക്കനേഷ്യന്‍ മേഖലകളിലെ 22 രാജ്യങ്ങളിലായി 2.7 മില്യണിലധികം സ്ഥലത്ത് 2,200ലധികം ഔട്‌ലെറ്റുകളുണ്ട്. സെന്റര്‍ പോയിന്റ്, ബേബി ഷോപ്, സ്പ്‌ളാഷ്, ലൈഫ്‌സ്‌റ്റൈല്‍, ഹോം സെന്റര്‍, ഷൂ മാര്‍ട്ട്, ഇമാക്‌സ് എന്നിവയടക്കമുള്ള കമ്പനി ബ്രാന്റുകളില്‍ 50,000ത്തിലധികം പേര്‍ ജോലി ചെയ്യുന്നു.
മിക്കി ജഗ്തിയാനിയുടെ നിര്യാണത്തില്‍ തിങ്കളാഴ്ച കമ്പനി പൊതുഅനുശോചന പരിപാടി സംഘടിപ്പിക്കുന്നുണ്ട്. അദ്ദേഹത്തിന്റെ ഭാര്യ രേണുക ജഗ്തിയാനിയാണ് നിലവില്‍ ഗ്രൂപ് ചെയര്‍പേഴ്‌സണ്‍.