മുക്കം: പുതുതലമുറയുടെ കൈകളിലാണ് രാജ്യത്തിന്റെ ഭാവിയെന്നും ഐക്യവും സഹവര്‍ത്തിത്വവും നിലനിര്‍ത്താന്‍ വിദ്യാര്‍ഥികള്‍ മുന്നിട്ടിറങ്ങണമെന്നും പാണക്കാട് സയ്യിദ് ഹൈദരലി ശിഹാബ് തങ്ങള്‍ പറഞ്ഞു. കൊടിയത്തൂര്‍ പി.ടി.എം ഹയര്‍ സെക്കന്‍ഡറി സ്‌കൂളില്‍ നിര്‍മിച്ച പുതിയ കെട്ടിടത്തിന്റെ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മലബാറിലെ ന്യൂനപക്ഷ വിദ്യാഭ്യാസ രംഗത്ത് ഇ.എം.ഇ.എയുടെ പങ്ക് വളരെ വലുതാണ്, മുന്‍ നേതാക്കള്‍ ഉള്‍ക്കാഴ്ചയോടെ നടത്തിയ പ്രവര്‍ത്തനങ്ങളാണ് ഈ നേട്ടങ്ങള്‍ക്ക് പിന്നിലെന്നും അദ്ദേഹം പറഞ്ഞു. ചടങ്ങില്‍ പി.കെ ബഷീര്‍ എം.എല്‍.എ അധ്യക്ഷത വഹിച്ചു.
        സയന്‍സ് ലാബ് സി.പി മുഹമ്മദ് കുട്ടിയും വെബ്‌സൈറ്റ് ലോഞ്ചിങ് ഗ്രാമ പഞ്ചായത്ത് പ്രസിഡന്റ് സി.ടി.സി അബ്ദുള്ളയും നിര്‍വഹിച്ചു. മാസ് റിയാദിന്റെ ശീതീകരിച്ച കുടിവെളള പദ്ധതി പി.കെ ബഷീര്‍ എം.എല്‍.എയും സൗണ്ട് സിസ്റ്റം കെ.സി നൗഷാദും ഉദ്ഘാടനം ചെയ്തു.
        സ്‌കൂള്‍ സപ്ലിമെന്റ് പി.ടി.എ പ്രസിഡന്റ് സി.പി അസീസ് പ്രകാശനം ചെയ്തു. പ്രധാനാധ്യാപകന്‍ പി.ജെ കുര്യന്‍, ബാലത്തില്‍ ബാപ്പു, എം.സി മുഹമ്മദ് ഹാജി, കെ.വി അബ്ദുറഹിമാന്‍, മജീദ് പുതുക്കുടി, സുബൈര്‍ നെല്ലിക്കാപറമ്പ്, കെ.ടി ഉമ്മര്‍, കെ.സി നൗഫല്‍, ഗിരീഷ് കാരക്കുറ്റി, എ.എം നൗഷാദ്, എം.എ അബ്ദുറഹിമാന്‍,  ബാബു മൂലയില്‍, പി.കെ കമറുദ്ദീന്‍, കെ.കെ ഗഫൂര്‍, അമീന്‍ ബാസില്‍, പി.ടി ഇസ്മയില്‍ സംസാരിച്ചു.