ന്യൂഡല്‍ഹി: മദ്യനയ അഴിമതിക്കേസില്‍ അറസ്റ്റിലായ ഡല്‍ഹി മുഖ്യമന്ത്രി അരവിന്ദ് കെജ് രിവാളിനെ രൂക്ഷമായി വിമര്‍ശിച്ച് അണ്ണാ ഹസാരെ. കെജ് രിവാളിന്റെ ചെയ്തികളാണ് അറസ്റ്റിലേക്ക് നയിച്ചതെന്ന് അണ്ണാ ഹസാരെ പറഞ്ഞു.

താനും കെജ്‌രിവാളും മദ്യത്തിനെതിരെ ഒരുമിച്ച് ശബ്ദമുയര്‍ത്തിയവര്‍ ആയിരുന്നെന്നും എന്നാല്‍ കെജ്‌രിവാള്‍ പിന്നീട് മദ്യത്തിനായി പ്രത്യേക നയം കൊണ്ടുവന്നെന്നും ഇത് തന്നെ ഏറെ വിഷമത്തിലാക്കിയതെന്നും അദ്ദേഹം പറഞ്ഞു.

മഹാരാഷ്ട്രയില്‍നിന്നുള്ള സാമൂഹിക പ്രവര്‍ത്തകനായിരുന്ന അണ്ണാ ഹസാരെയുടെ നേതൃത്വത്തില്‍ 2010ല്‍ നടന്ന അഴിമതിക്കെതിരായ ലോക്പാല്‍ പ്രക്ഷോഭങ്ങളിലൂടെയാണ് അരവിന്ദ് കെജ്രിവാള്‍ ശ്രദ്ധ നേടുന്നത്. 'ലോക്പാല്‍' അഴിമതി വിരുദ്ധ ഓംബുഡ്‌സ്മാന്‍ രൂപവത്കരിക്കണമെന്നാവശ്യപ്പെട്ട് അന്ന് ഇരുവരും ചേര്‍ന്ന് കോണ്‍ഗ്രസ് നേതൃത്വത്തിലുള്ള കേന്ദ്ര സര്‍ക്കാറിനെതിരെ അനിശ്ചിതകാല സത്യഗ്രഹത്തിനടക്കം നേതൃത്വം നല്‍കിയിരുന്നു. പിന്നീട് അണ്ണാ ഹസാരെയുമായി വഴിപിരിഞ്ഞ കെജ്രിവാള്‍ ആം ആദ്മി പാര്‍ട്ടി രൂപവത്കരിച്ചു.