തൊടുപുഴ: ഓണക്കാലത്ത് പാലിന്റെ ആവശ്യകത വര്‍ധിക്കുകയും ഗുണനിലവാരം കുറഞ്ഞ പാല്‍ വിപണിയില്‍ വിറ്റഴിക്കപ്പെടാന്‍ സാധ്യതയുള്ളതിനാല്‍ പാലിന്റെ ഗുണനിലവാരം പരിശോധിക്കുന്നതിന് ക്ഷീരവികസന വകുപ്പ് സൗകര്യമൊരുക്കുന്നു. പാലിന്റെ ഗുണമേന്മ ഉറപ്പാക്കുന്നതിനും ഉപഭോക്താക്കള്‍ക്ക് ശുദ്ധവും സുരക്ഷിതവുമായ പാല്‍ ലഭ്യമാക്കുകയെന്ന ലക്ഷ്യത്തോടെ കുമളി ചെക്ക്‌പോസ്റ്റിലും തൊടുപുഴ മിനി സിവില്‍ സ്റ്റേഷനില്‍ പ്രവര്‍ത്തിക്കുന്ന ഇന്‍ഫര്‍മേഷന്‍ സെന്ററിലും ഏഴു മുതല്‍ 13 വരെ ഓണക്കാലത്ത് പ്രത്യേക പരിശോധന നടത്തും. ഈ ദിവസങ്ങളില്‍ പാല്‍ ഗുണനിയന്ത്രണ ഓഫിസിനോടനുബന്ധിച്ച് പ്രവര്‍ത്തിക്കുന്ന ഇന്‍ഫര്‍മേഷന്‍ സെന്ററില്‍ രാവിലെ ഒന്‍പതു മണി മുതല്‍ വൈകീട്ട് എട്ടു മണിവരെ പാല്‍ ഉപഭോക്താക്കള്‍ക്കും ഉല്‍പാദകര്‍ക്കും പാലിന്റെ ഗുണനിലവാരം സൗജന്യമായി പരിശോധിച്ച് നല്‍കും. സൗജന്യ പരിശോധനക്കായി കുറഞ്ഞത് 100 മില്ലി ലിറ്റര്‍ പാല്‍ കൊണ്ടുവരണം. വിപണിയില്‍ ലഭ്യമാകുന്ന എല്ലാ ബ്രാന്റ് പാലും പരിശോധിച്ച് പരിശോധനാഫലം പ്രസിദ്ധീകരിക്കുന്നതുമാണെന്ന് ഇടുക്കി ക്ഷീരവികസന വകുപ്പ് ഡെപ്യൂട്ടി ഡയറക്ടര്‍ അറിയിച്ചു.