രണ്ടായിരത്തിലേറെ തടവുകാർക്ക് മോചനം: ബലി പെരുന്നാൾ ദിനത്തിൽ കൂടുതൽ തടവുകാർക്ക് മോചനം നൽകി യുഎഇയിലെ വിവിധ എമിറേറ്റുകൾ

അജ്‌മാൻ: ബലി പെരുന്നാൾ ദിനത്തിൽ കൂടുതൽ തടവുകാർക്ക് മോചനം നൽകി യുഎഇയിലെ വിവിധ എമിറേറ്റുകൾ. ഷാർജയിൽ നിന്ന് 390 പേരെയും അജ്മാനിൽ നിന്ന് 166 തടവുകാരെയും ദുബായിയിൽ നിന്ന് 650 തടവുകാരെയുമാണ് മോചിപ്പിക്കുക. യുഎഇ പ്രസിഡൻ്റ് ഷെയ്ഖ് മുഹമ്മദ് ബിന്‍ സായിദ് അൽ നഹ്യാൻ നേരത്തെ മോചിപ്പിച്ച തടവുകാർക്ക് പുറമെയാണ് ഓരോ എമിറേറ്റിലെയും ഭരണാധികാരികൾ ബലി പെരുന്നാളിനോട് അനുബന്ധിച്ച് തടവുകാരെ മോചിപ്പിക്കുന്നത്.

998 തടവുകാരെയാണ് യുഎഇ പ്രസിഡന്റ് നേരത്തെ മോച്ചപ്പിച്ചത്. ഇതിന് പിന്നാലെയാണ് ദുബായിലെ ജയിലുകളിൽ നിന്ന് 650 തടവുകാരെ മോചിപ്പിക്കാൻ യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം രംഗത്ത് വന്നത്.

ഷാർജയിൽ തടവിലുണ്ടായിരുന്ന 390 പേരെ മോചിപ്പിക്കാൻ യുഎഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയാണ് ഉത്തരവിട്ടത്. അജ്മാനിൽ നിന്ന് 166 തടവുകാരെ മോചിപ്പിക്കാൻ യുഎഇ സുപ്രീം കൗൺസിൽ അംഗവും അജ്മാൻ ഭരണാധികാരിയുമായ ഷെയ്ഖ് ഹുമൈദ് ബിൻ റാഷിദ് അൽ നുഐമിയും ഉത്തരവിട്ടു.

ഉമ്മുൽഖുവൈനിലെ വിവിധ ജയിലുകളിൽ നിന്ന് തടവുകാരെ മോചിപ്പിക്കാൻ സുപ്രീം കൗൺസിൽ അംഗവും ഉമ്മുൽ ഖുവൈൻ ഭരണാധികാരിയുമായ ഷെയ്ഖ് സൗദ് ബിൻ റാഷിദ് അൽ മുഅല്ലയും ഉത്തരവിട്ടിരുന്നു. രണ്ടായിരത്തിലേറെ തടവുകാർക്കാണ് എല്ലാ എമിറേറ്റുകളിൽ നിന്നുമായി മോചനം ലഭിക്കുക.

ഗുരുതരമല്ലാത്ത കേസുകളിൽ ജയിൽ ശിക്ഷ അനുഭവിക്കുന്നവർക്കാണ് മോചനം നൽകുന്നത്. ശിക്ഷാ കാലയളവിൽ മികച്ച പെരുമാറ്റം ഉള്ളവരെയാണ് മോചിപ്പിക്കാൻ പരിഗണിക്കുന്നത്. വിട്ടയക്കപ്പെടുന്നവരെല്ലാം എത്രയും പെട്ടെന്ന് തങ്ങളുടെ കുടുംബവുമായി ചേർന്ന് മികച്ച ജീവിതം നയിക്കാൻ സാധിക്കട്ടെയെന്ന് ഭരണാധികാരികള്‍ ആശംസിച്ചു.

ആഘോഷങ്ങളോട് അനുബന്ധിച്ച് ഗുരുതരമല്ലാത്ത കുറ്റങ്ങൾക്ക് ജയിലിൽ കഴിയുന്നവരെ വിട്ടയക്കുന്നത് ഗൾഫിലെ ഇസ്‌ലാമിക രാജ്യങ്ങളുടെ പാരമ്പര്യത്തിന്റെ ഭാഗമാണ്. രണ്ട് പെരുന്നാളുകൾ, രാജ്യത്തിന്റെ സ്ഥാപക ദിനം തുടങ്ങിയ അവസരങ്ങളിലും ഇത്തരം മോചനങ്ങൾ ഇവിടെ പതിവാണ്.