കോഴിക്കോട്ടെ പ്രശസ്തമായ റെസ്റ്റോറന്റായ പാരഗണിനെ തേടി മറ്റൊരു നേട്ടം കൂടി. ബിരിയാണിക്ക് പ്രസിദ്ധിയാര്‍ജിച്ച പാരഗണ്‍ ലോകത്തിലെ ഏറ്റവും മികച്ച 150 റെസ്‌റ്റോറന്റുകളുടെ പട്ടികയില്‍ ഉള്‍പ്പെട്ടിട്ടുണ്ട്. മികച്ച റെസ്റ്റോറന്റുകളും അവിടുത്തെ ജനപ്രിയ വിഭവങ്ങളും ലിസ്റ്റ് ചെയ്യപ്പെട്ട പട്ടികയിലാണ് കോഴിക്കോടിന്റെ സ്വന്തം പാരഗണ്‍ പതിനൊന്നാം സ്ഥാനം സ്വന്തമാക്കിയത്. ട്രാവല്‍ ഗൈഡ് പ്ലാറ്റ്‌ഫോമായ ടേസ്റ്റ് അറ്റ്‌ലസാണ് പ്രസ്തുത പട്ടിക പുറത്തിറക്കിയത്.

പാരഗണിനൊപ്പം മറ്റ് ആറ് ഇന്ത്യന്‍ റെസ്റ്റോറന്റുകള്‍ കൂടി പട്ടികയില്‍ ഇടം നേടിയിട്ടുണ്ട്. ടേസ്റ്റ് അറ്റ്‌ലസ് തലമുറകള്‍ കൈമാറി വന്ന രുചികളെ അതുപോലെ നിലനിര്‍ത്താന്‍ ഈ റെസ്‌റ്റോറന്റുകള്‍ ശ്രമിച്ചിട്ടുണ്ടെന്ന് അഭിപ്രായപ്പെട്ടു. ടേസ്റ്റ് അറ്റ്‌ലസിന്റെ 150 റെസ്‌റ്റോറന്റുകളുടെ പട്ടികയില്‍ വിയന്നയില്‍ നിന്നുളള ഫീഗല്‍മുളളറാണ് ഒന്നാം സ്ഥാനത്തെത്തിയിട്ടുളളത്. ന്യൂയോര്‍ക്ക് സിറ്റിയിലെ കാറ്റ്‌സ് ഡെലിക്കേറ്റസെന്‍ രണ്ടാം സ്ഥാനത്തെത്തിയപ്പോള്‍ ഇന്തോനേഷ്യയില്‍ നിന്നുളള വാറുങ് മാക് ബെംഗ് മൂന്നാം സ്ഥാനത്ത് ഇടം പിടിച്ചു.

1939ല്‍ സ്ഥാപിതമായ പാരഗണ്‍ പരമ്പരാഗത മലബാര്‍ ഭക്ഷണം വിളമ്പുന്നതില്‍ മേഖലയിലെ തന്നെ മികച്ചയിടമാണെന്നാണ് ടേസ്റ്റ് അറ്റ്‌ലസിന്റെ വെബ്‌സൈറ്റ് ചൂണ്ടിക്കാട്ടുന്നത്. പാരഗണിലെ ബിരിയാണിയെയാണ് അവരുടെ ഐക്കോണിക്ക് ഡിഷായി വെബ്‌സൈറ്റ് ചൂണ്ടിക്കാട്ടുന്നത്.

Content Highlights:paragon kozhikode is the 11th out of 150 world's most legendary restaurant's list