ദുബൈ: റാസല്‍ഖൈമയിലെ വള്ളംകളിക്കാരന്‍ ആലപ്പുഴയിലുമെത്തി. ആലപ്പുഴ പുന്നമടക്കായലിലെ ഓളപ്പരപ്പുരകളിലെ ജലോത്സവം കണ്ട ആവേശത്തിലാണ് ആരിഫ് അല്‍ ഹറങ്കി. നേരത്തെ യു.എ.ഇയിലെ റാസല്‍ഖൈമയില്‍ നെഹ്റുട്രോഫി വള്ളംകളി നടത്തിയ വ്യക്തിയാണ് ആരിഫ്. കഴിഞ്ഞ മാര്‍ച്ചിലായിരുന്നു റാസല്‍ഖൈമയിലെ വള്ളംകളി. ഉദ്ഘാടനം ചെയ്തത് കേരള മുഖ്യമന്ത്രി പിണറായി വിജയനും. യു.എ.ഇ.യിലെ ഡ്രാഗണ്‍ ബോട്ടിനെ ചുണ്ടന്‍വള്ളത്തിന്റെ മാതൃകയിലാക്കിയാണ് റാസല്‍ഖൈമയില്‍ വള്ളംകളി നടത്തിയത്. ഇത്തവണ വള്ളം കളി കാണാന്‍ യു.എ.ഇയിലെ ഇന്റര്‍നാഷണല്‍ മറൈന്‍ സ്പോര്‍ട്സ് ക്ലബ് മാനേജരായ ആരിഫ് അല്‍ ഹറങ്കി കുടുംബവുമൊത്താണ് ആലപ്പുഴയിലെത്തിയത്. പുന്നമടയിലെ ജലമേള ആസ്വദിച്ച് സന്തോഷത്തിലാണ് ആരിഫിന്റെ മടക്കം. വരുംവര്‍ഷങ്ങളില്‍ യു.എ.ഇയില്‍ കൂടുതല്‍ ഭംഗിയോടെ ജലോല്‍സവം സംഘടിപ്പിക്കുമെന്ന് അദ്ദേഹം പറഞ്ഞു. യു.എ.ഇയില്‍ വള്ളംകളി നടത്തുന്നതിന് ചീഫ് കോ-ഓര്‍ഡിനേറ്ററായ റിയാസ് കാട്ടിലും ആരിഫിനൊപ്പമുണ്ടായിരുന്നു.