കോവളം: വിഴിഞ്ഞം അടിമലത്തുറയില്‍ വളര്‍ത്തു നായയെ ചൂണ്ടയില്‍ കോര്‍ത്ത് വള്ളത്തില്‍ കെട്ടിയിട്ട് അടിച്ചുകൊന്നു. സംഭവത്തില്‍ പ്രായപൂര്‍ത്തി ആകാത്ത ഒരാള്‍ ഉള്‍പ്പെടെ മൂന്നു പേരെ പൊലിസ് അറസ്റ്റ് ചെയ്തു.

അടിമലത്തുറ സ്വദേശികളായ സുനില്‍ (22), ശിലുവയ്യന്‍ (20), 17കാരന്‍ എന്നിവരാണ് അറസ്റ്റിലായത്. അടിമലത്തുറ സ്വദേശി ക്രിസ്തുരാജിന്റെ ലാബ്രഡോര്‍ ഇനത്തില്‍ പെട്ട ബ്രൂണോ എന്ന നായയെയാണ് ഇവര്‍ ക്രൂരമായി തല്ലിക്കൊന്നത്. ജൂണ്‍ 28ന് രാവിലെ 9.30ഓടെയാണ് സംഭവം നടന്നതെങ്കിലും നായയെ കെട്ടിതൂക്കി തല്ലിക്കൊല്ലുന്നതിന്റെ വിഡിയോ സാമൂഹ്യ മാധ്യമങ്ങളില്‍ പ്രചരിച്ചതോടെയാണ് സംഭവം പുറത്തറിഞ്ഞത്. ദിവസവും തീരത്തേക്ക് അഴിച്ചുവിടുന്ന ശീലമുള്ള നായ ശിലുവയ്യന്റെ മാതാവിനെ കടിച്ചതാണ് പ്രകോപനത്തിന് കാരണമെന്ന് പൊലിസ് പറയുന്നു. മത്സ്യബന്ധന വള്ളത്തിനടിയില്‍ വിശ്രമിക്കുകയായിരുന്ന നായയെ മൂവരും ചേര്‍ന്ന് വള്ളത്തിലെ ചൂണ്ട കൊളുത്തില്‍ ബന്ധിച്ച ശേഷം മരക്കഷ്ണം ഉപയോഗിച്ച് ആക്രമിക്കുകയായിരുന്നു. അടിയേറ്റ് ചത്ത നായയെ കടലിലേക്ക് വലിച്ചെറിയുകയും ചെയ്തു. അയല്‍വാസികള്‍ തമ്മിലുള്ള തര്‍ക്കമാണ് നായയെ അടിച്ചു കൊന്നതിനു പിന്നിലെന്നും ആക്ഷേപമുണ്ട്.