ഇന്ത്യന്‍ കാര്‍ഷിക ഗവേഷണ കൗണ്‍സിലിന്റെ ആഭിമുഖ്യത്തില്‍ (ഐ.സി.എ.ആര്‍) ഈ വര്‍ഷം നടത്തുന്ന ക്വോട്ട പ്രവേശനത്തിന് സി.യു.ഇ.ടി- യു.ജി 2024ല്‍ യോഗ്യത നേടണം. താല്‍പര്യമുള്ളവര്‍ക്ക് https://exams.nta.ac.in/CUET-UG ല്‍ മാര്‍ച്ച് 26ന് രാത്രി 11.50 വരെ രജിസ്റ്റര്‍ ചെയ്യാം. ഇതിനുള്ള മാര്‍ഗ നിര്‍ദേശങ്ങളും പരീക്ഷയുടെ വിശദാംശങ്ങളും വെബ്‌സൈറ്റില്‍ ഇന്‍ഫര്‍മേഷന്‍ ബുള്ളറ്റിനിലുണ്ട്. 

സി.യു.ഇ.ടി (ഐ.സി.എ.ആര്‍-യുജി) 2024 റാങ്കടിസ്ഥാനത്തില്‍ കൗണ്‍സിലിങ് കാര്‍ഷിക- അനുബന്ധ ബിരുദ കോഴ്‌സുകളില്‍ 20 ശതമാനം അഖിലേന്ത്യ ക്വോട്ട സീറ്റുകളിലും ഐ.സി.എ.ആര്‍- ദേശീയ ക്ഷീര ഗവേഷണ ഇന്‍സ്റ്റിറ്റ്യൂട്ട് ന്യൂഡല്‍ഹി, ആര്‍.എല്‍.ബി കേന്ദ്ര കാര്‍ഷിക വാഴ്‌സിറ്റി (ബിഹാര്‍) എന്നിവിടങ്ങളിലെ മുഴുവന്‍ സീറ്റുകളിലും പ്രവേശനത്തിന് അര്‍ഹതയുണ്ടായിരിക്കും. 

വെറ്ററിനറി സയന്‍സ് ഒഴികെ ഇനി പറയുന്ന 12 ബിരുദ കോഴ്‌സുകളിലാണ് (നാല് വര്‍ഷം) പ്രവേശനം, ബി.എസ്.സി (ഓണേഴ്‌സ്)- അഗ്രികള്‍ച്ചര്‍, ഹോര്‍ട്ടി കള്‍ച്ചര്‍, ഫോറസ്ട്രി, കമ്യൂണിറ്റി സയന്‍സ്, ഫുഡ് ന്യൂട്രീഷന്‍ ആന്‍ഡ് ഡയറ്റിക്‌സ്, സെറകള്‍ച്ചര്‍, നാച്ചുറല്‍ ഫാമിങ്, ബാച്ചിലര്‍ ഓഫ് ഫീഷറീസ് സയന്‍സ്, ബി.ടെക്- അഗ്രികള്‍ച്ചറല്‍ എഞ്ചിനീയറിങ്, ഡെയറി ടെക്‌നോളജി, ഫുഡ് ടെക്‌നോളജി, ബയോ ടെക്‌നോളജി. 

യോഗ്യത
മാനദണ്ഡങ്ങളും സെലക്ഷന്‍ നടപടികളും അടക്കമുള്ള സമഗ്ര വിവരങ്ങള്‍ www.icar.rog.in ല്‍ ലഭ്യമാണ്. ഫിസിക്‌സ്, കെമിസ്ട്രി, മാത്തമാറ്റിക്‌സ്, ബയോളജി, അഗ്രികള്‍ച്ചര്‍ വിഷയങ്ങളോടെ പ്ലസ് ടു/ തത്തുല്യ പരീക്ഷ 50 ശതമാനം മാര്‍ക്കില്‍ കുറയാതെ വിജയിച്ചവര്‍ക്കാണ് അവസരം. 

എസ്.സി/ എസ്.ടി/ പിഡബ്ല്യൂബിഡി/ തേര്‍ഡ് ജന്‍ഡര്‍ വിഭാഗങ്ങള്‍ക്ക് 40 ശതമാനം മാര്‍ക്ക് മതി. സിയുഇടി (ഐ.സി.എ.ആര്‍- യു.ജി) 2024 റാങ്ക് പരിഗണിച്ച് പ്രവേശനം നല്‍കുന്ന രാജ്യത്തെ കാര്‍ഷിക സര്‍വകലാശാലകളും ഐ.സി.എ.ആര്‍ ക്വോട്ട സീറ്റുകളും കോഴ്‌സുകളും മറ്റും വെബ്‌സൈറ്റിലുണ്ട്. 

കേരള കാര്‍ഷിക സര്‍വകലാശലയുടെ ബി.എസ്.സി (ഓണേഴ്‌സ്)- അഗ്രികള്‍ച്ചര്‍, ഫോറസ്ട്രി, ബി.ടെക്- അഗ്രികള്‍ച്ചറല്‍ എഞ്ചിനീയറിങ്, ഫുഡ് ടെക്‌നോളജി, കേരള ഫിഷറീസ് ആന്‍ഡ് ഓഷ്യന്‍ സയന്‍സസ് സര്‍വകലാശാലയുടെ ബി.എഫ്.എസ്.സി, കേരള വെറ്ററിനറി ആന്‍ഡ് അനിമല്‍ സയന്‍സസ് സര്‍വകലാശാലയുടെ ബി.ടെക് ഡെയറി ടെക്‌നോളജി കോഴ്‌സുകളും ഈ പരീക്ഷയുടെ പരിധിയല്‍പ്പെടും. 

വിദ്യാഭ്യാസ വാർത്തകള്‍ വാട്സ്ആപ്പിൽ ലഭിക്കാന്‍ ക്ലിക് ചെയ്യുക