പത്തനംതിട്ട: തിരുവല്ലക്കടുത്ത് കുറ്റൂരില്‍ പഞ്ചായത്ത് പ്രസിഡന്റിന്റെ നേതൃത്വത്തില്‍ വൃദ്ധനെ ആക്രമിച്ച സംഭവത്തില്‍ 20 പേര്‍ക്കെതിരെ പൊലിസ് കേസെടുത്തു. വഴിത്തര്‍ക്കത്തെ തുടര്‍ന്ന് 71 കാരനെ വീട്ടില്‍ കയറി അര്‍ധരാത്രി വെട്ടിപ്പരുക്കേല്‍പ്പിച്ചതിനാണ് കേസ്. കുറ്റൂര്‍ പഞ്ചായത്ത് പ്രസിഡന്റ് കെ.ജി സഞ്ചുവിനും സംഘത്തിനുമെതിരൊയാണ് കേസ്.

ഇന്നലെ രാത്രി പതിനൊന്ന് മണിയോടെയാണ് സംഭവം. തെങ്ങേരി പുതിരിക്കാട്ട് സ്വദേശി രമണനെയാണ് പഞ്ചായത്ത് പ്രസിഡന്റിന്റെ നേതൃത്വത്തില്‍ എത്തിയ ഗുണ്ടാസംഘം ആക്രമിച്ചതെന്നാണ് പരാതി. ജെസിബി ഉപയോഗിച്ച് മതില്‍ തകര്‍ക്കുകയും ചെയ്തു.
രമണന്റെ വീടിനുമുകളിലേക്ക് ആക്രമിസംഘം കല്ലെറിഞ്ഞെന്നും പരാതിയില്‍ പറയുന്നു.
വീടിനു പിറകിലുള്ള വഴി മൂന്നടി വീതിയില്‍, ആറുകുടുംബങ്ങള്‍ക്ക് ഉപയോഗിക്കാനായി 21 വര്‍ഷം മുന്‍പ് കരാര്‍ എഴുതിയതാണ്. ഈ വഴി വീതി കൂട്ടിനല്‍കണമെന്നാവശ്യപ്പെട്ടാണ് അക്രമസംഘം വീടിന്റെ മതില്‍ പൊളിച്ചത്.

ഈ സമയത്ത് സ്ഥലത്തെത്തിയ പൊലിസുകാര്‍ മതില്‍ പൊളിക്കുന്നത് നോക്കി നിന്നെന്നും പരാതിയില്‍ പറയുന്നു. മതില്‍ പൊളിക്കുന്നത് തടയാന്‍ എത്തിയപ്പോഴാണ് രമണന് നേരെ ആക്രമണമുണ്ടായത്. കൈക്ക് വെട്ടേറ്റ ഇദ്ദേഹം താലൂക്ക് ആശുപത്രിയില്‍ ചികിത്സയിലാണ്.