മണിപ്പൂരില്‍ വീണ്ടും സംഘര്‍ഷം; അക്രമികള്‍ രണ്ട് വീടുകള്‍ നശിപ്പിച്ചു

ഇംഫാല്‍: ഇടവേളക്ക് ശേഷം മണിപ്പൂരില്‍ വീണ്ടും സംഘര്‍ഷം. ഇംഫാല്‍ വെസ്റ്റ് ജില്ലയിലാണ് സംഘര്‍ഷമുണ്ടായത്. അക്രമകാരികള്‍ രണ്ട് വീടുകള്‍ തീവെച്ച് നശിപ്പിച്ചു. രാവിലെ 10 മണിയോടെ കെയ്‌തെലാന്‍ബി പൊലിസ് സ്റ്റേഷന്‍ പരിധിയിലാണ് സംഘര്‍ഷമുണ്ടായത്. സുരക്ഷാസേനയും ഫയര്‍ഫോഴ്‌സും എത്തിയാണ് തീയണച്ചത്.

സംഘര്‍ഷത്തെ തുടര്‍ന്ന് സ്ത്രീകളുടെ ഒരു സംഘം പ്രദേശത്ത് തടിച്ചുകൂടിയെങ്കിലും സുരക്ഷാസേന ഇടപ്പെട്ട് ഇവരെ ശാന്തരാക്കി. അക്രമികള്‍ക്കു നേരെ പൊലിസ് നിരവധി തവണ വെടിവെച്ചതായാണ് റിപ്പോര്‍ട്ട്. അധിക സേനയെ വിന്യസിച്ച് പ്രശ്‌നം പരിഹരിച്ചിട്ടുണ്ടെന്നും സ്ഥിതി നിയന്ത്രണ വിധേയമാണെന്നും പൊലിസ് അറിയിച്ചു.

മണിപ്പൂരില്‍ നടന്ന വംശീയ സംഘര്‍ഷത്തില്‍ ഇതുവരെ 180 പേരാണ് കൊല്ലപ്പെട്ടത്. നൂറുകണക്കിന് ആളുകള്‍ക്ക് പരിക്കേല്‍ക്കുകയും ചെയ്തിരുന്നു. മേയ് മൂന്നിന് നടന്ന ട്രൈബല്‍ സോളിഡാരിറ്റി മാര്‍ച്ചിനെ തുടര്‍ന്നാണ് മണിപ്പൂരില്‍ സംഘര്‍ഷം ഉടലെടുത്തത്.