മീററ്റ് (ഉത്തര്‍പ്രദേശ്): കൊവിഡ് ലോക്ഡൗണില്‍ സഹായം നല്‍കി ക്രിസ്തുമതത്തിലേക്ക് മാറാന്‍ നിര്‍ബന്ധിച്ചതായി ആരോപിച്ച് യു.പിയില്‍ ഒമ്പത് പേര്‍ക്കെതിരേ പൊലിസ് കേസെടുത്തു. മീററ്റില്‍ പ്രാദേശിക ബി.ജെ.പി നേതാവ് ദീപക് ശര്‍മയാണ് പരാതിക്കാരെ അണിനിരത്തി രംഗത്തെത്തിയത്.

പ്രദേശത്തെ ചേരികളില്‍ താമസിക്കുന്ന ഉന്തുവണ്ടി കച്ചവടക്കാരെ കൈസ്തവ ദേവാലയം സന്ദര്‍ശിക്കാന്‍ പ്രോത്സാഹിപ്പിച്ചുവെന്നും ഹിന്ദു ദൈവങ്ങളുടെ വിഗ്രഹങ്ങള്‍ നശിപ്പിക്കാന്‍ നിര്‍ബന്ധിച്ചെന്നും പരാതിയില്‍ പറയുന്നു. ലോക്ഡൗണില്‍ ചേരിനിവാസികള്‍ക്ക് ഭക്ഷണവും വീട്ടുചെലവിനുള്ള പണവും നല്‍കി മതംമാറ്റാന്‍ പ്രേരിപ്പിച്ചെന്നാണ് പരാതി.

ആധാര്‍ കാര്‍ഡില്‍ പേര് മാറ്റാന്‍ നിര്‍ബന്ധിച്ചു. ദീപാവലി ആഘോഷിക്കുമ്പോള്‍ വീട്ടില്‍ കയറി ഹിന്ദു ദൈവങ്ങളുടെ ചിത്രങ്ങള്‍ വലിച്ചുകീറി. മതംമാറിയിരുന്നതിനാല്‍ ക്രിസ്തുവിനോട് പ്രാര്‍ത്ഥിക്കണമെന്ന് നിഷ്‌കര്‍ഷിച്ചു. പ്രതിഷേധിച്ചപ്പോള്‍ ഓരോരുത്തര്‍ക്കും രണ്ടു ലക്ഷം രൂപ വീതം നല്‍കാന്‍ ശ്രമിച്ചു. ആയുധങ്ങളുമായി വന്ന് പരാതിപ്പെട്ടാല്‍ കൊല്ലുമെന്ന് ഭീഷണിപ്പെടുത്തിയെന്നും പരാതിക്കാരന്‍ ആരോപിച്ചു. ചേരിനിവാസികളെ ബി.ജെ.പി നേതാവ് പൊലിസ് സൂപ്രണ്ടിന് മുന്നില്‍ ഹാജരാക്കിയാണ് പരാതി നല്‍കിയത്.