ട്രാഫിക് നിയമം തെറ്റിക്കാതെ വാഹനമോടിച്ചവർക്ക് സൗജന്യ ഇന്ധനം; തെറ്റിച്ചവർക്ക് റോസാപൂക്കളും ബോധവത്‌കരണവും

അബുദാബി: അൽഐൻ സിറ്റിയിലെ ഗതാഗത നിയമങ്ങൾ കർശനമായി പാലിച്ച ഡ്രൈവർമാരെ ആദരിച്ച് ഭരണകൂടം. ഇതിന്റെ ഭാഗമായി അർഹരായ ഡ്രൈവർമാർക്ക് സൗജന്യ ഇന്ധന കാർഡുകൾ വിതരണം ചെയ്തു. ജനങ്ങൾക്ക് സന്തോഷം പകരാനും പോസിറ്റീവ് ജീവിതശൈലി പ്രോത്സാഹിപ്പിക്കാനും ലക്ഷ്യമിട്ടുള്ള ഹാപ്പിനസ് പട്രോൾ ആണ് ഇന്ധന കാർഡുകൾ അവതരിപ്പിച്ചത്.

പോസിറ്റീവ് ട്രാഫിക് സ്വഭാവം പ്രോത്സാഹിപ്പിക്കുകയും റോഡ് സുരക്ഷ വർദ്ധിപ്പിക്കുകയും ചെയ്യുക എന്നതാണ് ഈ സംരംഭത്തിന്റെ ലക്ഷ്യം. അബുദാബി പൊലിസിന്റെ ജനറൽ കമാൻഡും അഡ്‌നോക് ഡിസ്ട്രിബ്യൂഷൻ കമ്പനിയും സംയുക്ത ശ്രമത്തിൽ മോഡൽ ഡ്രൈവർമാരെ അംഗീകരിക്കുന്നതിനും പ്രതിഫലം നൽകുന്നതിനുമായാണ് ഈ സംരംഭം ആരംഭിച്ചത്.

ഈ അംഗീകാരം നല്ല ട്രാഫിക് പെരുമാറ്റത്തിനുള്ള പ്രേരണയായി വർത്തിക്കുമെന്ന് അൽ ഐൻ ട്രാഫിക് ഡിപ്പാർട്ട്‌മെന്റ് ഡയറക്ടർ കേണൽ മതാർ അബ്ദുല്ല അൽ-മാഹിരി പറഞ്ഞു. ഇത് റോഡ് സുരക്ഷയ്ക്ക് മാത്രമല്ല, സുരക്ഷിതമായ ഡ്രൈവിംഗ് രീതികൾ സ്വീകരിക്കാൻ മറ്റ് ഡ്രൈവർമാരെ പ്രോത്സാഹിപ്പിക്കുകയും ചെയ്യുമെന്ന് അദ്ദേഹം കൂട്ടിച്ചേർത്തു.

നഗരത്തിലെ ട്രാഫിക് സംവിധാനങ്ങളിലുടനീളം അവബോധം വളർത്തുന്നതിനും സുരക്ഷിതമായ ഡ്രൈവിംഗ് രീതികൾ പ്രോത്സാഹിപ്പിക്കുന്നതിനുമുള്ള ലക്ഷ്യം പങ്കിടുന്ന പൊലിസിന്റെയും അതിന്റെ പങ്കാളികളുടെയും ഈ അസാധാരണ സംരംഭത്തിന് ഡ്രൈവർമാർ തങ്ങളുടെ നന്ദി അറിയിച്ചു.

അതേസമയം, ട്രാഫിക് നിയമങ്ങൾ ലംഘിക്കുന്നത് ഒഴിവാക്കണമെന്ന് അൽഐൻ ട്രാഫിക് അഡ്മിനിസ്ട്രേഷൻ ഡ്രൈവർമാരോട് അഭ്യർത്ഥിച്ചു. ലംഘനം കണ്ടെത്തിയവർക്ക് റോസാപ്പൂക്കളും ലഘുലേഖകളും നൽകി. സമൂഹത്തോടുള്ള ഡ്രൈവർമാരുടെ ഉത്തരവാദിത്തത്തെക്കുറിച്ച് ബോധവൽക്കരിക്കുന്നതിനും അവബോധം വളർത്തുന്നതിനുമുള്ള ശ്രമത്തിന്റെ ഭാഗമായാണ് ലഘുലേഖകൾ വിതരണം ചെയ്‌തത്‌. ഈ ലഘുലേഖകളിൽ ട്രാഫിക് നിയമങ്ങൾ പാലിക്കേണ്ടതിന്റെ പ്രാധാന്യവും ജീവനും സ്വത്തുക്കളും സംരക്ഷിക്കുന്നതിനുള്ള തുടർച്ചയായ ശ്രമങ്ങളും ഊന്നിപ്പറയുന്നു.