15 ലക്ഷം കൈക്കൂലി വാങ്ങുന്നതിനിടെ രാജസ്ഥാനില്‍ ഇ.ഡി ഉദ്യോഗസ്ഥന്‍ അറസ്റ്റില്‍

ജയ്പൂര്‍: രാജസ്ഥാനില്‍ കൈക്കൂലി കേസില്‍ ഇ.ഡി ഉദ്യോഗസ്ഥരെ കസ്റ്റഡിയിലെടുത്തു. ഇടനിലക്കാരില്‍ നിന്ന് 15 ലക്ഷം രൂപ കൈക്കൂലി വാങ്ങുന്നതിനിടെയാണ് രണ്ട് ഉദ്യോഗസ്ഥര്‍ അറസ്റ്റിലായതെന്ന് ആന്റി കറപ്ഷന്‍ ബ്യൂറോ അറിയിച്ചു.

നോര്‍ത്ത് ഇംഫാല്‍ ഇ.ഡി ഓഫിസറായ നവല്‍ കിഷോര്‍ മീണയും മറ്റൊരു ഉദ്യോഗസ്ഥനുമാണ് അറസ്റ്റിലായത്. ചിട്ടി ഫണ്ടുമായി ബന്ധപ്പെട്ട് കേസ് ഒത്തുതീര്‍പ്പാക്കാനാണ് പണം വാങ്ങിയത്.

എന്‍ഫോഴ്‌സ്‌മെന്റ് ഡയറക്ടറേറ്റ് ഉദ്യോഗസ്ഥന്‍ കൈക്കൂലി ആവശ്യപ്പെട്ട കാര്യം പരാതിക്കാരന്‍ എസിബിയെ അറിയിക്കുകയായിരുന്നു. ചിട്ടിഫണ്ട് കേസുമായി ബന്ധപ്പെട്ട് ഇംഫാലിലെ സ്വത്ത് കണ്ടുകെട്ടാതിരിക്കാനും അറസ്റ്റ് ഒഴിവാക്കുന്നതിനുമായാണ് ഇഡി ഉദ്യോഗസ്ഥന്‍ കൈക്കൂലി ആവശ്യപ്പെട്ടത്.

രണ്ടുപേരെയും ചോദ്യം ചെയ്തുവരികയാണെന്നും ഇരുവര്‍ക്കുമെതിരെ അഴിമതിനിരോധന നിയമപ്രകാരം കേസ് എടുക്കുമെന്നും എസിബി ഡെപ്യൂട്ടി ഇന്‍സ്‌പെക്ടര്‍ പറഞ്ഞു.