തിരുവനന്തപുരം: ബഫര്‍സോണ്‍ മേഖലകളില്‍ നടത്തിയ ഉപഗ്രഹ സര്‍വേയുടെ ആശങ്ക പരിഹരിക്കാത്തതില്‍ സര്‍ക്കാരിനെതിരേ വീണ്ടും പ്രക്ഷോഭം കടുപ്പിക്കുന്നു. മലയോരമേഖലയുടെ ആശങ്കക്ക് കൃത്യമായ മറുപടി നല്‍കാന്‍ വനം റവന്യു വകുപ്പുകള്‍ക്കാവുന്നില്ല. കര്‍ഷകരുടെ ആശയക്കുഴപ്പം പരിഹരിക്കാന്‍ രംഗത്തിറങ്ങിയ മന്ത്രി റോഷി അഗസ്റ്റിനും കൃത്യമായ ഉത്തരം നല്‍കാനാകുന്നില്ല.
വനവിസ്തൃതി വര്‍ധിപ്പിക്കുന്നതിന് വേണ്ടി വനംവകുപ്പും പരിസ്ഥിതി സംഘടനകളും നടത്തുന്ന ഗൂഢാലോചനയുടെ ഭാഗമാണ് ഉപഗ്രഹ സര്‍വേയെന്ന് ഹൈറേഞ്ച് സംരക്ഷണ സമിതി ആവശ്യപ്പെട്ടു കഴിഞ്ഞു. അതേസമയം, കോഴിക്കോട് ജില്ലയില്‍ സംസ്ഥാന സര്‍ക്കാരിനെതിരെ പ്രത്യക്ഷ സമരത്തിന് കെസിബിസിയും രംഗത്തുവന്നു കഴിഞ്ഞു.

ഇപ്പോഴത്തെ സര്‍ക്കാര്‍ നിലപാടുകളില്‍ കടുത്ത ആശങ്കയുണ്ടെന്ന് കത്തോലിക്ക സഭാ നേതൃത്വം വ്യക്തമാക്കി. താരമശ്ശേരി രൂപതയുടെ നേതൃത്വത്തില്‍ മറ്റന്നാള്‍ ജനജാഗ്രത യാത്ര നടത്തുന്നതിനും തീരുമാനിച്ചിട്ടുണ്ട്. കടുത്ത പ്രതിഷേധം നിലനില്‍ക്കുന്ന കക്കയം, ചെമ്പനോട, ചക്കിട്ടപ്പാറ തുടങ്ങിയ മേഖലകളിലൂടെയാണ് യാത്രകള്‍ കടന്നുപോകുന്നത്. താമരശ്ശേരി രൂപത അധ്യക്ഷന്‍ തന്നെ പരിപാടിയില്‍ പങ്കെടുക്കും. കര്‍ഷക ജാതി മത സംഘടനകളെ അണിനിരത്തിയുള്ള ജനകീയ പ്രതിഷേധമാണ് ലക്ഷ്യമിടുന്നത്.

അതേ സമയം പ്രതിഷേധം കനത്തതോടെ വിദഗ്ധ സമിതിക്ക് പരാതി നല്‍കാനുള്ള സമയപരിധി നീട്ടാനും സര്‍ക്കാര്‍ ആലോചിക്കുന്നുണ്ട്. 23 നുള്ളില്‍ പരാതി നല്‍കാന്‍ ആയിരുന്നു മുന്‍ തീരുമാനം. ഉപഗ്രഹ സര്‍വേക്കെതിരെ വ്യാപക പരാതികള്‍ ഉയര്‍ന്ന സാഹചര്യത്തിലാണ് പരാതി നല്‍കാനുള്ള സമയ പരിധി നീട്ടുന്നത്. പരാതികള്‍ സ്വീകരിക്കാന്‍ പഞ്ചായത്തുകളില്‍ ഹെല്‍പ് ഡെസ്‌ക് തുടങ്ങാന്‍ തീരുമാനിച്ചിട്ടുണ്ട്. പരാതികള്‍ പരിശോധിച്ചു വീണ്ടും ഫീല്‍ഡ് സര്‍വേ നടത്താനും സര്‍ക്കാര്‍ തീരുമാനിച്ചിട്ടുണ്ട്. 20നാണ് വിദഗ്ധ സമിതി യോഗം ചേരുന്നത്.