സ്വന്തം ലേഖകന്‍
തൊടുപുഴ: നിര്‍മാണ നിരോധനമുള്ള മൂന്നാറില്‍ ടൂറിസത്തിന്റെ മറവില്‍ വന്‍കിട നിര്‍മാണമെന്ന് ആക്ഷേപം. വൈദ്യുതി ബോര്‍ഡിന് കീഴിലുള്ള ഹൈഡല്‍ ടൂറിസം വിഭാഗത്തിന്റെ കൈവശമുള്ള ഹൈഡല്‍ പാര്‍ക്കിലാണ് ഡാം സുരക്ഷയെ പോലും അവഗണിച്ച് നിര്‍മാണപ്രവര്‍ത്തനങ്ങള്‍ നടക്കുന്നത്. മൂന്നാര്‍ സര്‍വിസ് സഹകരണ ബാങ്കിന് കെ.എസ്.ഇ.ബി പാട്ടത്തിന് നല്‍കിയ ഭൂമിയാണിത്.
അനധികൃത നിര്‍മാണം ശ്രദ്ധയില്‍പ്പെട്ടതിന് തുടര്‍ന്ന് ദേവികുളം സബ് കലക്ടറുടെ നിര്‍ദേശ പ്രകാരം മൂന്നാര്‍ വില്ലേജ് ഓഫിസര്‍ സ്റ്റോപ്പ് മെമ്മോ നല്‍കിയെങ്കിലും നിര്‍മാണം തുടരുകയാണ്.
പള്ളിവാസല്‍ പദ്ധതിയുടെ മൂന്നാര്‍ രാമസ്വാമി അയ്യര്‍ ഹെഡ് വര്‍ക്ക്‌സ് ഡാമിന് സമീപമാണ് ഹൈഡല്‍ പാര്‍ക്ക്. ഇരുവശത്തുകൂടിയും തോട് ഒഴുകുന്നതിനാല്‍ തുരുത്തിന്റെ രൂപമാണ് സ്ഥലത്തിനുള്ളത്.
2018 ലെ പ്രളയത്തില്‍ പൂര്‍ണമായും മൂടപ്പെട്ട സ്ഥലം കൂടിയാണിത്. ഇതിന് സമീപമാണ് പള്ളിവാസല്‍ വിപുലീകരണ പദ്ധതിയുടെ ടണല്‍ തുടങ്ങുന്നത്.

എം.എം. മണി വൈദ്യുതി മന്ത്രിയായിരിക്കെയാണ് രണ്ടേക്കറോളം ചതുപ്പ് മൂന്നാര്‍ സര്‍വിസ് സഹ. ബാങ്കിന് പാട്ടത്തിന് നല്‍കിയത്. പിന്നാലെ ഇവിടമാകെ ഇടിച്ച് നിരത്തുകയായിരുന്നു. നിലവില്‍ പലയിടത്തായി കോണ്‍ക്രീറ്റ് കെട്ടിടങ്ങളുടെ നിര്‍മാണവും തുടങ്ങിയിട്ടുണ്ട്. നിര്‍മാണം പൂര്‍ത്തിയാകുന്നതോടെ മഴക്കാലത്ത് വെള്ളം കയറുന്ന സ്ഥലം ഡാമിനുതന്നെ ഭീഷണിയായി മാറിയേക്കും.
നിര്‍മാണത്തിനുവേണ്ട യാതൊരു അനുമതികളുമില്ലെന്നു കണ്ടതോടെയാണ് റവന്യൂ അധികൃതര്‍ ജോലികള്‍ നിര്‍ത്തിവയ്ക്കാന്‍ ആവശ്യപ്പെട്ടത്. എന്നാല്‍ അനുമതിക്കായി കലക്ടര്‍ക്ക് അപേക്ഷ സമര്‍പ്പിച്ചിട്ടുണ്ടെന്നായിരുന്നു സൊസൈറ്റിയുടെ ന്യായം.

ഇത്തരമൊരു ഫയല്‍ തനിക്കു ലഭിച്ചിട്ടില്ലെന്ന് കലക്ടറും വ്യക്തമാക്കി. ഇതിനിടെ ഉന്നതതലത്തില്‍ ഇടപെട്ട് ഇവിടെ താല്‍കാലിക നിര്‍മാണ അനുമതി നേടിയെടുക്കാന്‍ നീക്കമുണ്ട്. വീടു നിര്‍മാണത്തിനുപോലും കര്‍ശന നിയന്ത്രണമുള്ള മൂന്നാറിലാണ് ടൂറിസത്തിന്റെ മറവില്‍ വാണിജ്യാടിസ്ഥാനത്തിലുള്ള നിര്‍മാണത്തിന് അനുമതി നല്‍കാനുള്ള നീക്കം നടക്കുന്നത്.