ന്യൂഡല്‍ഹി: ഹാന്‍ഡ് ബാഗേജിലോ കൈവശമോ കീശയിലോ സൂക്ഷിച്ച ഫോണുകള്‍, ചാര്‍ജറുകള്‍, ലാപ്‌ടോപുകള്‍ തുടങ്ങിയ ഇലക്ട്രോണിക് ഉപകരണങ്ങള്‍ പ്രത്യേക ട്രേകളില്‍ നല്‍കി പരിശോധിപ്പിച്ച ശേഷം തിരിച്ചെടുക്കണമെന്നത് വിമാനത്താവളങ്ങളില്‍ സ്‌കാനര്‍ മെഷീന്‍ പരിശോധനാ വേളയില്‍ യാത്രക്കാര്‍ അനുഭവിക്കുന്ന ബുദ്ധിമുട്ടുകളിലൊന്നാണ്. ഈ പ്രയാസം ഒഴിവാക്കാനായി ഇന്ത്യയിലെ വിമാനത്താവളങ്ങളില്‍ പുതിയ യന്ത്രങ്ങള്‍ സ്ഥാപിക്കുന്നു. ഡല്‍ഹി, മുംബൈ, ബംഗളൂരു, ഹൈദരാബാദ് തുടങ്ങി എല്ലാ പ്രധാന വിമാനത്താവളങ്ങളിലും പുതിയ യന്ത്രങ്ങള്‍ സ്ഥാപിക്കും. ഒരു വര്‍ഷത്തിനുള്ളില്‍ മറ്റ് വിമാനത്താവളങ്ങളിലുമെത്തും.

പ്രത്യേക ട്രേകളില്‍ ഇടാതെ തന്നെ എയര്‍പോര്‍ട്ട് സുരക്ഷാ പരിശോധനകളിലൂടെ യാത്രക്കാര്‍ക്ക് വേഗത്തില്‍ കടന്നുപോകാം. തിരക്ക് ലഘൂകരിക്കാനും യാത്രക്കാര്‍ കൂട്ടംകൂടി നില്‍ക്കുന്നത് ഒഴിവാക്കാനും ഇത് സഹായിക്കും. ഒരേ ട്രേകളും മറ്റും നിരവധി പേര്‍ ഉപയോഗിക്കുന്നത് ഇല്ലാതാക്കാന്‍ കഴിയുന്നതോടെ കൊവിഡ് പോലെയുള്ള പകര്‍ച്ചവ്യാധികള്‍ പടരുന്നത് കുറയ്ക്കാനും സാധിക്കും.

ഇലക്‌ട്രോണിക് ഉപകരണങ്ങള്‍ നീക്കം ചെയ്യാതെ ബാഗുകള്‍ സ്‌ക്രീന്‍ ചെയ്യുന്നതിനുള്ള ആധുനിക ഉപകരണങ്ങള്‍ സ്ഥാപിക്കുന്നത് വേഗത്തിലാക്കുന്ന ഉത്തരവ് ബ്യൂറോ ഓഫ് സിവില്‍ ഏവിയേഷന്‍ സെക്യൂരിറ്റി (ബി.സി.എ.എസ്) ഒരു മാസത്തിനുള്ളില്‍ പുറത്തിറക്കും. യു.എസിലെയും യൂറോപ്പിലെയും പല വിമാനത്താവളങ്ങളിലും ഇത്തരം ലഗേജ് സ്‌കാനറുകള്‍ക്ക് ഉപയോഗത്തിലുണ്ട്. ഈ സ്‌കാനറില്‍ യാത്രക്കാരുടെ ഇലക്ട്രോണിക് ഉപകരണങ്ങളോ ജാക്കറ്റുകളോ പ്രത്യേകമായി മാറ്റിനല്‍കേണ്ട ആവശ്യമില്ല.

ഡല്‍ഹിയിലെ ഇന്ദിരാഗാന്ധി ഇന്റര്‍നാഷണല്‍ എയര്‍പോര്‍ട്ടിലെ പ്രധാന ആഭ്യന്തര, അന്തര്‍ദേശീയ ടെര്‍മിനലുകളില്‍ ചെക്ക്ഇന്‍, സെക്യൂരിറ്റി എന്നിവയിലൂടെ കടന്നുപോകാന്‍ പലപ്പോഴും യാത്രക്കാര്‍ മണിക്കൂറുകളോളം ക്യൂ നില്‍ക്കേണ്ടിവരുന്നുണ്ട്. വിമാനങ്ങള്‍ പുറപ്പെടാന്‍ വൈകുന്നതിനും ഇത് കാരണമാവാറുണ്ട്. കാലതാമസം ഒഴിവാക്കാന്‍ ഇന്ത്യയിലെ ഏറ്റവും വലിയ എയര്‍ലൈനായ ഇന്‍ഡിഗോ, സാധാരണ രണ്ട് മണിക്കൂറിന് പകരം മൂന്നര മണിക്കൂര്‍ മുമ്പെങ്കിലും ചെക്ക്ഇന്‍ ചെയ്യുന്നതിനായി ഡല്‍ഹി വിമാനത്താവളത്തില്‍ എത്താന്‍ യാത്രക്കാരോട് ആവശ്യപ്പെട്ടിരുന്നു. ആഗോള വ്യോമയാന മേഖലയെ സംബന്ധിച്ചിടത്തോളം ഡിസംബര്‍ തിരക്കേറിയ മാസമാണ്. കൊവിഡ് കാരണം രണ്ട് വര്‍ഷത്തെ നിയന്ത്രിത യാത്രയ്ക്ക് ശേഷം ഈ വര്‍ഷം ട്രാഫിക് കൂടുതലായിരിക്കുമെന്ന് പ്രതീക്ഷിക്കുന്നു.