യുഎഇ ദേശീയ ദിന ഔദ്യോഗിക പ്രദർശനം കാണാൻ ഇപ്പോൾ ടിക്കറ്റ് ബുക്ക് ചെയ്യാം

ദുബൈ: യുഎഇ നിവാസികൾക്ക് ഔദ്യോഗിക ദേശീയ ദിന പ്രദർശനത്തിന് ഇപ്പോൾ ടിക്കറ്റ് ബുക്ക് ചെയ്യാം. നൂതന സാങ്കേതികവിദ്യകളും ആശ്വാസകരമായ പ്രൊജക്ഷനുകളും ഉൾക്കൊള്ളുന്ന 52-ാമത് യുഎഇ യൂണിയൻ ഡേ ഡിസംബർ 5 മുതൽ 12 വരെയാണ് നടക്കുക. ദുബൈ എക്‌സ്‌പോ സിറ്റിയിലെ ജൂബിലി പാർക്കിലാണ് പ്രദർശനം.

1971-ലെ യൂണിയൻ മുതൽ ഇന്നുവരെയുള്ള യുഎഇയുടെ സുസ്ഥിരതാ യാത്ര വിവരിക്കുന്ന 30 മിനിറ്റ് ദൈർഘ്യമുള്ള ഷോയാണ് ഒരുക്കുന്നത്. 300 ദിർഹം മുതലാണ് ടിക്കറ്റ് നിരക്ക്. യൂണിയൻ ഡേ വെബ്സൈറ്റിൽ നിന്ന് ടിക്കറ്റുകൾ വാങ്ങാം. വൈകുന്നേരം 6 മണിക്ക് ആരംഭിക്കുന്ന പ്രദർശനത്തിന് 4 മണിക്ക് ഗേറ്റുകൾ ഓപ്പൺ ആകും. എല്ലാ ടിക്കറ്റ് ഉടമകളും വൈകുന്നേരം 5.40-ന് മുൻപായി തന്നെ പ്രദർശനത്തിന് വേണ്ടി കയറണം. ബുക്കിംഗ് സമയത്ത് പ്രത്യേക സീറ്റുകളൊന്നും റിസർവ് ചെയ്യാൻ പറ്റില്ല. ആദ്യം വരുന്നവർക്ക് ആദ്യം എന്ന അടിസ്ഥാനത്തിലാണ് ഇരിപ്പിടം ലഭിക്കുക.

അറബിയിലും ഇംഗ്ലീഷിലും ഷോ ഉണ്ടായിരിക്കും. ഇതോടൊപ്പം ഫ്രഞ്ച്, സ്പാനിഷ്, റഷ്യൻ ഭാഷകളിൽ ഒരേസമയം വിവർത്തനങ്ങൾ ലഭിക്കും.