കൊല്‍ക്കത്ത: ബി.സി.സി.ഐ അധ്യക്ഷന്‍ സൗരവ് ഗാംഗുലിക്കും ബംഗാള്‍ സര്‍ക്കാരിനും കല്‍ക്കട്ട ഹൈക്കോടതി പിഴ ചുമത്തി. ന്യൂടൗണ്‍ പ്രദേശത്ത് ഗാംഗുലിക്ക് സ്‌കൂള്‍ നിര്‍മിക്കാനായി പഞ്ചിമ ബംഗാള്‍ സര്‍ക്കാരും വെസ്റ്റ് ബംഗാള്‍ ഹൗസിങ് ഇന്‍ഫ്രാസ്ട്രക്ചര്‍ ഡവലപ്‌മെന്റ് കോര്‍പ്പറേഷനും അനധികൃതമായി ഭൂമി അനുവദിച്ചുവെന്ന കേസിലാണ് വിധി.

ഇന്ത്യന്‍ ക്രിക്കറ്റ് ടീം മുന്‍ നായകനായ ഗാംഗുലി പതിനായിരം രൂപയും സംസ്ഥാന സര്‍ക്കാരും വെസ്റ്റ് ബംഗാള്‍ ഹൗസിങ് ഇന്‍ഫ്രാസ്ട്രക്ചര്‍ ഡവലപ്‌മെന്റ കോര്‍പ്പറേഷനും അരലക്ഷം രൂപവീതവുമാണ് പിഴയൊടുക്കേണ്ടത്. നാലാഴ്ചക്കകം തുക വെസ്റ്റ് ബംഗാള്‍ ലീഗല്‍ സര്‍വിസ് അതോറിറ്റിയില്‍ നിക്ഷേപിക്കണമെന്ന് ആക്ടിങ് ചീഫ് ജസ്റ്റിസ് രാജേഷ് ബിന്‍ഡാലും ജസ്റ്റിസ് അര്‍ജിത് ബാനര്‍ജിയുമടങ്ങിയ ബെഞ്ച് പുറപ്പെടുവിച്ച വിധിയില്‍ പറയുന്നു. കുറ്റക്കാരായ ഉദ്യോഗസ്ഥരില്‍ നിന്ന് സര്‍ക്കാര്‍ തുക ഈടാക്കണമെന്നാണ് കോടതി നിര്‍ദേശം. ഭൂമി തിരികെ നല്‍കിയെങ്കിലും സുപ്രിംകോടതി നിര്‍ദേശിച്ച നിയമത്തിന് വിരുദ്ധമായി അധികാര ദുര്‍വിനിയോഗത്തിലൂടെ വ്യവഹാരങ്ങള്‍ നടത്തിയതിനാണ് പിഴ വിധിച്ചതെന്നും കോടതി വ്യക്തമാക്കി.

ഭൂമി അനുവദിക്കുന്നത് റദ്ദാക്കിയ സുപ്രിംകോടതി വിധി പരിഗണിച്ച് ഗാംഗുലി എജ്യൂക്കേഷന്‍ ആന്‍ഡ് വെല്‍ഫെയര്‍ സൊസൈറ്റി നിയമാനുസൃതമായി പ്രവര്‍ത്തിക്കണമായിരുന്നെന്ന്  കോടതി പറഞ്ഞു. ന്യൂടൗണില്‍ ഗാംഗുലിക്ക് രണ്ടേക്കര്‍ ഭൂമി അനുവദിച്ചതിനെ ചോദ്യം ചെയ്ത് 2016ല്‍ നല്‍കിയ പൊതുതാല്‍പര്യ ഹരജിയിലാണ് കോടതി വിധി.