മുംബൈ: ആഡംബര കപ്പലിലെ ലഹരിപ്പാര്‍ട്ടി കേസില്‍ അറസ്റ്റിലായ ഷാരൂഖ് ഖാന്റെ മകന്‍ ആര്യന്‍ഖാന്റെ ജാമ്യഹരജി പരിഗണിക്കുന്നത് മുംബൈ സെഷന്‍സ് കോടതി നാളത്തേയ്ക്ക് മാറ്റി. ആര്യന്‍ ഖാന്‍ അതുവരെ ആര്‍തര്‍ റോഡ് ജയിലില്‍ തുടരും.
ഹരജിയില്‍ നാര്‍കോട്ടിക് കണ്‍ട്രോള്‍ ബ്യൂറോയോട് (എന്‍.സി.ബി) മറുപടി സത്യവാങ്മൂലം സമര്‍പ്പിക്കാന്‍ കോടതി ആവശ്യപ്പെട്ടു. ബുധനാഴ്ച എന്‍.സി.ബി സത്യവാങ്മൂലം നല്‍കും. ബുധനാഴ്ച ഉച്ചയ്ക്ക് ശേഷം കോടതി ജാമ്യഹരജി പരിഗണിക്കും. കേസുമായി ബന്ധപ്പെട്ട് ഇതുവരെ 20 പേരെ അറസ്റ്റ് ചെയ്തിട്ടുണ്ടെന്ന് എന്‍.സി.ബി അറിയിച്ചു. ആര്യന്‍ഖാന്‍ കപ്പലിലുണ്ടായിരുന്നുവെന്ന് തെളിയിക്കാന്‍ ഷാരൂഖ് ഖാന്റെ ഡ്രൈവറുടെ മൊഴി എന്‍.സി.ബി രേഖപ്പെടുത്തി. റെയ്ഡ് നടന്ന ഒക്ടോബര്‍ രണ്ടിന് ആര്യനെ ആഡംബര ക്രൂയിസ് കപ്പലില്‍ കയറാനായി അന്താരാഷ്ട്ര ക്രൂയിസ് ടെര്‍മിനലില്‍ കൊണ്ടുചെന്നാക്കിയെന്നാണ് ഇയാളുടെ മൊഴി. ചോദ്യം ചെയ്യാന്‍ ഇയാള്‍ക്ക് സമന്‍സ് നല്‍കിയിട്ടുണ്ട്.
ആര്യനൊപ്പം അറസ്റ്റിലായ അര്‍ബാസ് മെര്‍ച്ചന്റിന്റെ ജാമ്യാപേക്ഷയിലും നാളെ കോടതിയില്‍ എന്‍.സി.ബി മറുപടി നല്‍കും. ആര്യന്റെയും അര്‍ബാസിന്റെയും ജാമ്യാപേക്ഷകള്‍ മാത്രമാണ് കോടതി പരിഗണിക്കുന്നത്. മുതിര്‍ന്ന അഭിഭാഷകരായ സതീഷ് മന്‍ഷിന്‍ഡെ, അമിത് ദേശായി എന്നിവരാണ് ആര്യനുവേണ്ടി ഹാജരായത്. പ്രോസിക്യൂഷനുവേണ്ടി പബ്ലിക് പ്രോസിക്യൂട്ടര്‍ അദ്വൈത് സേത്‌ന ഹാജരായി.