പുതുവർഷം പ്രകൃതിക്കൊപ്പം; പ്ലാസ്റ്റിക് കവറിനോട് നോ പറയാനൊരുങ്ങി ദുബൈ

ദുബൈ: ഒറ്റത്തവണ ഉപയോഗിക്കാവുന്ന പ്ലാസ്റ്റിക്ക് കവറുകൾ നിരോധിക്കുന്നതിലേക്ക് ചുവട് വെച്ച് ദുബൈ. ഇതിന്റെ ഭാഗമായി 2024 പുതുവർഷത്തിൽ ഗ്രേഡ് കുറ‍ഞ്ഞ പ്ലാസ്റ്റിക് കവറുകളുടെ വിൽപന പൂർണമായി നിർത്താൻ തീരുമാനിച്ച് ദുബൈയിലെ വ്യാപാര സ്ഥാപനങ്ങൾ. എന്നാൽ പുനരുപയോഗ സാധ്യതയുള്ള കവറുകൾ വിലക്ക് വാങ്ങാൻ സാധിക്കും.

ഒറ്റത്തവണ ഉപയോഗിക്കാവുന്ന പ്ലാസ്റ്റിക് കവറുകൾ ജനുവരി ഒന്ന് മുതൽ പൂർണമായും നിർത്തുമെന്നു റീട്ടെയ്ൽ ശൃംഖലയായ ക്യാരിഫോ അറിയിച്ചു. എന്നാൽ ദീർഘകാലം ഉപയോഗിക്കാവുന്ന പ്ലാസ്റ്റിക് കവറുകൾ ലഭ്യമാകും. എന്നാൽ പണം നൽകി മാത്രമാണ് ഇത് ലഭ്യമാക്കുക. വലുപ്പം അനുസരിച്ച് വില നിശ്ചയിച്ച് ആയിരിക്കും വിൽപന നടക്കുക.

സാധനങ്ങൾ വാങ്ങാൻ വരുന്നവർ സ്വന്തമായി കവറുകൾ കൊണ്ടുവരണം. കഴിഞ്ഞ വർഷം പുനരുപയോഗ കവറുകളുടെ ഉപയോഗം 87% വർധിപ്പിച്ചതായി ക്യാരിഫോ പ്രതിനിധി പറഞ്ഞു.