ചെന്നൈ
കനത്ത മഴയിൽ കടപുഴകിയ മരം ദേഹത്തുവീണു മരിച്ചെന്നു കരുതിയ യുവാവിനെ തോളിലേറ്റി ജീവിതത്തിലേക്ക് തിരികെയെത്തിച്ച് വനിതാ ഇൻസ്പെക്ടർ. 28 കാരനായ ഉദയകുമാറിനെയാണ് വനിതാ ഇൻസ്പെക്ടർ രാജേശ്വരി രക്ഷപ്പെടുത്തിയത്. യുവാവിനെയും തോളിലേറ്റി റോഡിലെത്തിച്ച് വാഹനം അന്വേഷിക്കുന്ന രാജേശ്വരിയുടെ വീഡിയോ ദൃശ്യം വൈറലായതോടെ സമൂഹ മാധ്യമങ്ങളിൽ അഭിനന്ദനപ്രവാഹമാണ്.
ടി.പി ചത്രം ശ്മശാനത്തിൽ ജോലി ചെയ്യുകയായിരുന്ന ഉദയകുമാറിൻ്റെ ദേഹത്ത് കനത്ത മഴയിലും കാറ്റിലും പെട്ടാണ് മരം വീണത്. ബോധരഹിതനായ ഉദയകുമാർ മരിച്ചെന്നാണ് അവിടെ ഒാടിക്കൂടിയവർ കരുതിയത്. ഒരാൾ മരംവീണ് മരിച്ചെന്ന് പ്രദേശവാസികളിലാരോ പൊലിസിൽ അറിയിച്ചു. സംഭവസ്ഥലത്തെത്തി പരിശോധിച്ച ടി.പി ചത്രം ഇൻസ്പെക്ടർ രാജേശ്വരിക്ക് ഉദയകുമാറിന് ജീവൻ നഷ്ടമായിട്ടില്ലെന്ന് മനസിലായി. ഇതോടെ സ്വയം തോളിലേറ്റി റോഡിലെത്തിച്ച് ഉദയകുമാറിനെ ഒരു ഒാട്ടോറിക്ഷയിൽ കയറ്റി ആശുപത്രിയിലേക്ക് അയക്കുകയായിരുന്നു. പാദരക്ഷയൊന്നുമില്ലാതെ, ചെളിയിലൂടെ ഉദയകുമാറിനെയും തോളിലേറ്റി നടന്നു നീങ്ങുന്ന വനിതാ ഇൻസ്പെക്ടറുടെ ദൃശ്യം സമൂഹ മാധ്യമങ്ങളിൽ വൈറലായി. ഉദയകുമാർ കീഴ്പാക്കം സർക്കാർ ആശുപത്രിയിലെ തീവ്രപരിചരണ വിഭാഗത്തിൽ സുഖം പ്രാപിച്ചുവരുന്നതായാണ് ലഭിക്കുന്ന റിപ്പോർട്ടുകൾ. തമിഴ്നാട് പൊലിസും വാർത്താ ഏജൻസികളുമാണ് വനിതാ ഇൻസ്പെക്ടറുടെ രക്ഷാദൌത്യത്തിൻ്റെ വീഡിയോ സമൂഹ മാധ്യമങ്ങളിൽ പങ്കുവച്ചത്.