ന്യൂഡല്‍ഹി: മള്‍ട്ടി ലെയര്‍ നെറ്റ്‌വര്‍ക്ക് മാര്‍ക്കറ്റിങ് വിലക്കി കേന്ദ്ര സര്‍ക്കാര്‍. നേരിട്ടുള്ള വില്‍പനയുടെ മറവില്‍ ആളുകളെ കണ്ണികളായി ചേര്‍ത്ത് വില്‍പന നടത്തുന്ന രീതിയാണ് നിരോധിച്ചത്. ഇതുസംബന്ധിച്ച് കേന്ദ്രം വിജ്ഞാപനമിറക്കി.
2021ലെ കണ്‍സ്യൂമര്‍ പ്രൊട്ടക്ഷന്‍ (ഡയരക്ട് സെല്ലിങ് ) റൂള്‍ പ്രകാരം ചെയിന്‍ മാര്‍ക്കറ്റിങ്ങിനും നിരോധനം ഏര്‍പ്പെടുത്തി. പ്രൈസ് ചിറ്റ്‌സ് ആന്‍ഡ് മണി സര്‍ക്കുലേഷന്‍ സ്‌കീം നിരോധന നിയമത്തിന്റെ രണ്ടാം വകുപ്പിലെ മണിചെയിന്‍ പദ്ധതികള്‍ക്കും നിരോധനമേര്‍പ്പെടുത്തിയിട്ടുണ്ട്. ആംവെ, ടപ്പര്‍വേര്‍, ഒറിഫ്‌ളൈം തുടങ്ങിയ കമ്പനികള്‍ക്ക് ഇനി ഉപഭോക്താക്കളെ ചങ്ങലകളാക്കി വിപണം നടത്താനാകില്ല.

ഡയരക്ട് സെല്ലിങ് കമ്പനികള്‍ക്ക് വിപണനം നടത്തുന്നതിനും സേവനം നല്‍കുന്നതിനും ഉത്തരവാദിത്വമുണ്ട്. ഇവയുടെ കണക്കും സൂക്ഷിക്കണം. എല്ലാ ഡയരക്ട് സെല്ലിങ് കമ്പനികളും പുതിയ റൂള്‍ പ്രകാരമുള്ള നടപടികള്‍ 90 ദിവസത്തിനകം നടപ്പില്‍ വരുത്തി സര്‍ക്കാരിനെ അറിയിക്കണം. ഇകൊമേഴ്‌സ് നടത്തുന്ന കമ്പനികള്‍ അതിന്റെ നിയമങ്ങളും പാലിക്കണം. ഇത്തരം കമ്പനികളുടെ സംവിധാനം നിരീക്ഷിക്കാന്‍ സംവിധാനമൊരുക്കാന്‍ സംസ്ഥാന സര്‍ക്കാര്‍ കമ്പനികളുമായി ആശയവിനിമയം നടത്തണം. എല്ലാ കമ്പനികള്‍ക്കും ഒരു രജിസ്‌ട്രേഡ് ഓഫിസെങ്കിലും രാജ്യത്തുണ്ടാകണം തുടങ്ങിയവയാണ് പുതിയ ചട്ടത്തിലെ വ്യവസ്ഥകള്‍.