ഇസ്‌റാഈലിന്റെ മിലിട്ടറി ഇന്റലിജന്‍സ് മേധാവി മേജര്‍ ജനറല്‍ അഹരോണ്‍ ഹലീവ രാജിവൈച്ചു. ഇസ്‌റാഈലിന്റെ ഫലസ്തീനികള്‍ക്കെതിരെയുള്ള അതിക്രമങ്ങളുടെ തിരിച്ചടിയായി ഒക്ടോബര്‍ ഏഴിന് ഹമാസ് നടത്തിയ തിരിച്ചടി ഇന്റലിജന്‍സ് വീഴ്ചയാണെന്ന് കണ്ടെത്തിയതിനെതുടര്‍ന്നാണ് ഇയാളുടെ രാജി.

വിഷയത്തില്‍ സ്ഥാനമൊഴിയുന്ന ആദ്യത്തെ മുതിര്‍ന്ന ഉദ്യോഗസ്ഥനാണ് മേജര്‍ ജനറല്‍ അഹരോണ്‍ ഹലീവ. 2023 ഒക്ടോബര്‍ ഏഴിന് ഹമാസ് നടത്തിയ ആക്രമണം തടയുന്നതില്‍ പരാജയപ്പെട്ടതിന്റെ ഉത്തരവാദിത്തം ഏറ്റെടുത്താണ് ഇന്റലിജന്‍സ് ഡയറക്ടറേറ്റ് മേധാവി തിങ്കളാഴ്ച രാജിവച്ചതെന്ന് ഇസ്‌റാഈല്‍ സൈന്യം അറിയിച്ചു.

ഹമാസ് ആക്രമണത്തില്‍ 1170 പേര്‍ കൊല്ലപ്പെട്ടെന്നാണ് ഇസ്‌റാഈല്‍ അധികൃതരെ ഉദ്ധരിച്ച് എ.എഫ്.പി റിപ്പോര്‍ട്ട് ചെയ്തത്. എന്നാല്‍ ഇപ്പോള്‍ ഇസ്‌റാഈല്‍ ആക്രമണങ്ങളില്‍ 34,097 പേര്‍ കൊല്ലപ്പെട്ടതായാണ് ഫലസ്തീന്‍ അതോറിറ്റിയുടെ ആരോഗ്യ മന്ത്രാലയം വ്യക്തമാക്കുന്നത്. ഇവരില്‍ അധികവും കുട്ടികളും സ്ത്രീകളുമാണെന്നും ചൂണ്ടിക്കാട്ടുന്നു.