കോഴിക്കോട്: വൈദ്യുതി നിലച്ചതിനെ തുടര്‍ന്ന് കെ.എസ.്ഇ.ബി ഓഫീസ് ആക്രമിച്ചെന്ന് പരാതി. കോഴിക്കോട് പന്തീരാങ്കാവില്‍ കഴിഞ്ഞ ദിവസം രാത്രിയിലാണ് സംഭവം. ഒരു സംഘം ആളുകളെത്തി സ്ഥാപനത്തിന് നാശനഷ്ടം വരുത്തിയെന്നാണ് പരാതി.

സെക്ഷന്‍ ഓഫീസ് ജീവനക്കാരാണ് പൊലീസില്‍ പരാതി നല്‍കിയത്. ആക്രമികള്‍ ഓഫീസിന്റെ ബോര്‍ഡ് തകര്‍ത്തുവെന്നാണ് ജീവനക്കാരുടെ പരാതിയില്‍ പറയുന്നത്. സംഭവത്തില്‍ അന്വേഷണം ആരംഭിച്ചിട്ടുണ്ട്.

അതിക്രമിച്ചു കയറിയതിനും നാശനഷ്ടം വരുത്തിയതിലും പ്രതിഷേധിച്ച് ജീവനക്കാര്‍ സംയുക്തമായി പ്രതിഷേധ പ്രകടനവും ധര്‍ണ്ണയും നടത്തി. അക്രമികളെ അറസ്റ്റ് ചെയ്തു ജീവനക്കാര്‍ക്ക് സ്വൈര്യമായി ജോലി ചെയ്യുവാനുള്ള സാഹചര്യം ഉണ്ടാക്കണമെന്ന് വിവിധ സംഘടനാ നേതാക്കള്‍ ആവശ്യപ്പെട്ടു. 

അതേസമയം, പന്തീരാങ്കാവ് പ്രദേശത്ത് ഇടയ്ക്കിടയ്ക്ക് വൈദ്യുത തടസം സംഭവിക്കുന്നത് ജീവനക്കാരുടെ അനാസ്ഥ മൂലമെന്നാണ് നാട്ടുകാര്‍ പറയുന്നത്. എന്നാല്‍, ഉന്നത ഉദ്യോഗസ്ഥരുടെ നിര്‍ദ്ദേശപ്രകാരമാണ് ട്രാന്‍സ്‌ഫോര്‍മറുകള്‍ ഓഫാക്കിയതെന്നാണ് ജീവനക്കാര്‍ പ്രതികരിച്ചത്. വൈദ്യുതിയുടെ അമിത ഉപഭോഗം മൂലമാണ് ഇത്തരത്തില്‍ ചെയ്തതെന്നും അത് നാട്ടുകാര്‍ തെറ്റിദ്ധരിക്കുകയായിരുന്നുവെന്നുമാണ് ജീവനക്കാര്‍ പറഞ്ഞത്.