കോഴിക്കോട്: കോഴിക്കോട് വിമാനത്താവളത്തില്‍ നിന്ന് ലക്ഷദ്വീപിലെ അഗതി വിമാന സര്‍വീസ് ആരംഭിച്ചിരിക്കുകയാണ് ഇന്‍ഡിഗോ. കൊച്ചിക്ക് പുറമെയാണ് കോഴിക്കോട്ടേക്കും ഇന്‍ഡിഗോ പുതിയ വിമാന സര്‍വീസുകള്‍ ആരംഭിച്ചത്.കോഴിക്കോട്-കൊച്ചി, കൊച്ചി-അഗത്തി, കോഴിക്കോട്-അഗത്തി എന്നിവിടങ്ങളില്‍ ഇന്‍ഡിഗോ മൂന്ന് പുതിയ റൂട്ടുകള്‍ പ്രഖ്യാപിച്ചിട്ടുണ്ട്. 

എല്ലാ ദിവസവും സര്‍വീസ് ഉണ്ടാകും. എടിആര്‍ വിമാനങ്ങളാണ് സര്‍വീസ് നടത്തുക. 78 പേര്‍ക്ക് സഞ്ചരിക്കാനാകും. അടുത്തിടെ ബെംഗളൂരുവിനും അഗത്തിക്കുമിടയില്‍ ദിവസേന നേരിട്ടുള്ള ഫ്‌ലൈറ്റുകള്‍ ഇന്‍ഡിഗോ ആരംഭിച്ചിരുന്നു.കൊച്ചിയില്‍ നിന്നും കോഴിക്കോട് നിന്നും അഗത്തിയെ ബന്ധിപ്പിക്കുന്ന പുതിയ റൂട്ടുകള്‍ ബിസിനസുകാര്‍ക്കും വിനോദ സഞ്ചാരികള്‍ക്കും മികച്ച ഓപ്ഷനുകള്‍ നല്‍കും.

കരിപ്പൂരില്‍ നിന്ന് രാവിലെ 10.20ന് പുറപ്പെടുന്ന വിമാനം 10.55ന് കൊച്ചിയില്‍ എത്തും. 11.25ന് കൊച്ചിയില്‍ നിന്ന് പുറപ്പെടും. ഉച്ചക്ക് ഒരു മണിക്ക് അഗത്തിയില്‍ എത്തുന്ന രീതിയിലാണ് സര്‍വീസ്. അഗത്തിയില്‍ നിന്ന് കോഴിക്കോട്ടേക്ക് ഉച്ചക്ക് 12.10ന് ആകും സര്‍വീസ്. 1.25ന് കൊച്ചിയില്‍ എത്തും. 1.45നു പുറപ്പെട്ട് 2.30ന് കോഴിക്കോട്ടെത്തും.5000ത്തിനും ആറായിരത്തിനും ഇടയിലായിരിക്കും ടിക്കറ്റ് നിരക്ക്.