കൊച്ചി: മോഷണം പോയ സൈക്കിളിന് പകരം വിദ്യാഭ്യാസമന്ത്രി അവന്തികയ്ക്ക് നേരിട്ട് സമ്മാനിച്ച സൈക്കിളും കള്ളന്‍ കൊണ്ടുപോയി. എന്നാല്‍ ഇത്തവണ ആശ്വസിക്കാം, മണിക്കൂറുകള്‍ക്കകം പൊലിസ് കള്ളനെ പൊക്കി. പാലാരിവട്ടം പൊലിസാണ് പ്രതി ആലപ്പുഴ ആറാട്ടുവഴി സ്വദേശി ഷാജിയെ ഒറ്റ ദിവസം കൊണ്ട് പിടികൂടിയത്. 

എറണാകുളം ഗവണ്‍മെന്റ് ഗേള്‍സ് ഹയര്‍ സെക്കന്‍ഡറി സ്‌കൂളില്‍നിന്ന് ഇത്തവണ എസ്.എസ്.എല്‍.സിയ്ക്ക് എല്ലാ വിഷയങ്ങള്‍ക്കും എ പ്ലസോടെ പാസായ അവന്തികയുടെ സൈക്കിള്‍ മേയ് മാസത്തിലാണ് മോഷണം പോയത്. അന്ന് സൈക്കിള്‍ കാണാതായത് പൊലിസില്‍ പരാതി നല്‍കുകയും അവിടെ വച്ച് തന്നെ മന്ത്രിയെ ഇ-മെയിലിലൂടെ കാര്യങ്ങള്‍ അറിയിക്കുകയു ചെയ്തു. 

പിന്നാലെ, ജൂണ്‍ രണ്ടിന് എണാകുളം എളമക്കര സ്‌കൂളിലെ സംസ്ഥാനതല പ്രവേശനോത്സവത്തില്‍ വെച്ച് മന്ത്രി വി.ശിവന്‍കുട്ടി അവന്തികയ്ക്ക് പുത്തന്‍ സൈക്കിള്‍ സമ്മാനിക്കുകയും ചെയ്തു. ഈ സൈക്കിളാണ് ഇപ്പോള്‍ കള്ളന്‍ കൊണ്ടുപോയത്. 

വെള്ളിയാഴ്ച രാവിലെയാണ് സൈക്കിള്‍ കാണാനില്ലെന്ന് വീട്ടുകാര്‍ അറിയുന്നത്. അടുത്ത വീട്ടിലെ സിസി ടിവിയില്‍ പുലര്‍ച്ചെ 4.30നാണ് മോഷണം നടന്നതെന്ന് മനസ്സിലായി. റെയിന്‍കോട്ട് ധരിച്ചിരുന്ന കള്ളന്റെ ദൃശ്യങ്ങളും ദൃശ്യങ്ങളില്‍ ഉണ്ടായിരുന്നെങ്കിലും ആളെ തിരിച്ചറിയാന്‍ സാധിക്കില്ലായിരുന്നു. അന്വേഷണം തുടര്‍ന്ന പാലാരിവട്ടം പൊലിസ് ഒടുവില്‍ കള്ളനെ പൊക്കി.

 ഇയാളില്‍നിന്ന് ലഭിച്ച വിവരത്തിന്റെ അടിസ്ഥാനത്തില്‍ പൊന്നുരുന്നിയില്‍ 1500 രൂപയ്ക്ക് വിറ്റ സൈക്കിള്‍ പൊലിസ് വീണ്ടെടുത്തിട്ടുണ്ട്. തൊണ്ടി മുതലായതിനാല്‍ കോടതി നടപടികള്‍ക്ക് ശേഷം മാത്രമേ അവന്തികയ്ക്ക് തിരികെ ലഭിക്കുകയുള്ളൂ..