ദോഹ: ഗൾഫ് മേഖലയിൽ യുദ്ധസമാനമായ സാഹചര്യം തുടരുന്നതിനിടെ ഖത്തർ തലസ്ഥാനമായ ദോഹയിൽ സ്ഫോടന പരമ്പരകൾ. ഖത്തർ വ്യോമാതിർത്തി ലക്ഷ്യമാക്കി എത്തിയ മിസൈലുകളെ പ്രതിരോധ സംവിധാനങ്ങൾ ആകാശത്തുവെച്ച് തന്നെ തകർക്കുകയാണെന്ന് റിപ്പോർട്ടുകൾ സൂചിപ്പിക്കുന്നു. ദോഹ നഗരത്തിന് മുകളിൽ ഒന്നിലധികം തവണ സ്ഫോടന ശബ്ദങ്ങൾ കേട്ടത് ജനങ്ങൾക്കിടയിൽ വലിയ പരിഭ്രാന്തി പരത്തിയിട്ടുണ്ട്. ഖത്തറിന്റെ മിസൈൽ പ്രതിരോധ വിഭാഗം അതീവ ജാഗ്രതയിലാണ്.

അതേസമയം, ഇറാനിൽ നിന്ന് തൊടുത്തുവിട്ട ഡ്രോണുകൾ തങ്ങളുടെ പ്രദേശത്ത് പതിച്ചതായി അസർബൈജാൻ വിദേശകാര്യ മന്ത്രാലയം  സ്ഥിരീകരിച്ചു. അതിർത്തി കടന്നെത്തിയ ഡ്രോണുകളിൽ ഒന്ന് നഖിവാൻ അന്താരാഷ്ട്ര വിമാനത്താവളത്തിലെ ടെർമിനൽ കെട്ടിടത്തിലാണ് പതിച്ചത്. മറ്റൊന്ന് ഷക്കറാബാദ് ഗ്രാമത്തിലെ സ്കൂളിന് സമീപം വീണു. വിമാനത്താവള കെട്ടിടത്തിന് കാര്യമായ കേടുപാടുകൾ സംഭവിക്കുകയും രണ്ട് സാധാരണക്കാർക്ക് പരുക്കേൽക്കുകയും ചെയ്തിട്ടുണ്ട്.

ഇറാന്റെ ഭാഗത്തുനിന്നുണ്ടായ ആക്രമണത്തെ അസർബൈജാൻ ശക്തമായി അപലപിച്ചു. ജനവാസ മേഖലകളെയും വിമാനത്താവളങ്ങളെയും ലക്ഷ്യം വച്ചുള്ള ഇത്തരം നീക്കങ്ങൾ അന്താരാഷ്ട്ര നിയമങ്ങളുടെ ലംഘനമാണെന്ന് അസർബൈജാൻ പ്രസ്താവനയിൽ വ്യക്തമാക്കി. മേഖലയിലെ വിവിധ രാജ്യങ്ങളിലേക്ക് സംഘർഷം വ്യാപിക്കുന്നത് ആഗോളതലത്തിൽ വലിയ ആശങ്കയുണ്ടാക്കുന്നുണ്ട്. സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണെന്നും കൂടുതൽ വിവരങ്ങൾ ഉടൻ ലഭ്യമാകുമെന്നും അധികൃതർ അറിയിച്ചു.

explosion sounds were reported again in qatar amid rising regional tensions, with indications that an iranian drone may have been intercepted. authorities are monitoring the situation as security forces investigate the incident and assess potential threats.