ആലപ്പുഴ: ആലപ്പുഴ പൂച്ചാക്കലില്‍ നടുറോഡില്‍ ദലിത് പെണ്‍കുട്ടിയെ മര്‍ദ്ദിച്ച കേസില്‍ രണ്ടു പേര്‍ അറസ്റ്റില്‍. ഒന്നാം പ്രതി ഷൈജു സഹോദരന്‍ രണ്ടാം പ്രതി ശൈലേഷ് എന്നിവരാണ് അറസ്റ്റിലായത്. പ്രതികള്‍ സി.പി.എം പ്രവര്‍ത്തകരായതിനാലാണ് അറസ്റ്റ് പോലുള്ള നടപടികളിലേക്ക് നീങ്ങാത്തതെന്ന് ആരോപണമുയര്‍ന്നിരുന്നു. സംഭവത്തിന്റെ ദൃശ്യങ്ങള്‍ പുറത്തു വന്നിട്ടും പ്രതികളെ അറസ്റ്റ് ചെയ്യാന്‍ പൊലിസ് തയ്യാറായിരുന്നില്ല. നിയമസഭയിലും ഇന്ന് വിഷയം കത്തിക്കയറി. ഇതിന് പിന്നാലെയാണ് അറസ്റ്റ് നടന്നത്.  

19കാരിയാണ് ആക്രമണത്തിനിരയായത്. തന്നെ ക്രൂരമായി മര്‍ദിച്ചെന്നും വസ്ത്രം വലിച്ചുകീറിയെന്നും പെണ്‍കുട്ടി പരാതിയില്‍ പറയുന്നു.  എഴുന്നേല്‍ക്കാനും നടക്കാനും പോലും പറ്റാത്ത അവസ്ഥയാണെന്നും തുറവൂരിലെ ആശുപത്രിയില്‍ ചികിത്സയില്‍ കഴിയുന്ന പെണ്‍കുട്ടി പറഞ്ഞതായി റിപ്പോര്‍ട്ടുകളുമുണ്ടായിരുന്നു.

അനിയന്‍മാരെ ആക്രമിച്ചതിന് പൊലിസില്‍ പരാതി നല്‍കിയ വൈരാഗ്യത്തിലാണ് പെണ്‍കുട്ടിക്ക് നേരെ റോഡില്‍ ആക്രമണമുണ്ടായത്. സഹോദരങ്ങളെ ഉപദ്രവിക്കുന്നത് തടയാന്‍ ചെന്നപ്പോള്‍ പെണ്‍കുട്ടിക്ക് മര്‍ദനമേല്‍ക്കുകയായിരുന്നു.