ഗസ്സ: ഗസ്സയിലുടനീളം ഇസ്‌റാഈല്‍ നടത്തിയ വ്യോമാക്രമണത്തില്‍ 57 പേര്‍ കൊല്ലപ്പെട്ടു. ഒരു മണിക്കൂറിനിടെ 48 പേരാണ് കഴിഞ്ഞ ദിവസം ഗസ്സയില്‍ കൊല്ലപ്പെട്ടത്. തെക്കന്‍, മധ്യ ഫലസ്തീനിലാണ് വ്യോമാക്രമണം നടന്നത്. ഹമാസിനെ വേരൊടെ ഇല്ലാതാക്കുന്നതുവരെ ആക്രമണം തുടരുമെന്നാണ് ഇസ്‌റാഈല്‍ സേന പറയുന്നത്.

റഫയിലും കനത്ത ആക്രമണമുണ്ടായി. വീടിനു നേരെ നടന്ന ആക്രമണത്തില്‍ അഞ്ചു ഫലസ്തീനികള്‍ കൊല്ലപ്പെട്ടു. ഖാന്‍ യൂനിസിനു സമീപമാണ് ആക്രമണം നടന്നത്. യുവാവും ഭാര്യയും രണ്ടു മക്കളുമാണ് കൊല്ലപ്പെട്ടത്.

കഴിഞ്ഞ ദിവസം 17 പേരാണ് കൊല്ലപ്പെട്ടത്. 26 പേര്‍ക്ക് പരുക്കേറ്റു. അല്‍ മവാസിക്കടുത്ത് അത്തര്‍ തെരുവില്‍ മാറിത്താമസിപ്പിച്ചവര്‍ക്ക് നേരെയാണ് ആക്രമണം നടന്നത്.

യു.എന്‍ നടത്തുന്ന നുസൈറത്ത് അഭയാര്‍ഥി ക്യാംപിലെ സ്‌കൂളിന് നേരെയും ആക്രമണം നടന്നു. ഇതില്‍ 23 പേര്‍ കൊല്ലപ്പെട്ടു. നിരവധി പേര്‍ക്ക് പരുക്കേറ്റു. ഇതുവരെ 38,713 പേരാണ് ഇതുവരെ ഗസ്സയില്‍ കൊല്ലപ്പെട്ടത്. 89,166 പേര്‍ക്ക് പരുക്കേറ്റിട്ടുണ്ട്. 

അതിനിടെ ഗസ്സയില്‍ വെടിനിര്‍ത്തല്‍ ചര്‍ച്ചകളും ഊര്‍ജ്ജിതമായി തുടരുകയാണ്. ഇസ്‌റാഈലിന് മേല്‍ അമേരിക്ക ഇതിനായി ശക്തമായ സമ്മര്‍ദ്ദം ചെലുത്തുന്നുണ്ട്. എന്തു വില കൊടുത്തും വെടിനിര്‍ത്തല്‍ നടപ്പാക്കണമെന്ന് ഇസ്‌റാഈലിനോട് അമേരിക്ക നിര്‍ദ്ദേശിച്ചതായി യു.എസ് സ്റ്റേറ്റ് വകുപ്പ് വ്യക്തമാക്കുന്നു.  തിങ്കളാഴ്ച വാഷിങ്ടണില്‍ ബൈഡന്‍- നെതന്യാഹു ചര്‍ച്ച നടക്കുന്നുണ്ട്. വെടിനിര്‍ത്തല്‍ ആവശ്യം ഉന്നയിച്ച് ടെല്‍ അവീവിലും ജറുസലമിലും ആയിരങ്ങള്‍ പ്രകടനം നടത്തി.