മൈക്രോസോഫ്റ്റ് വിൻഡോസിലെ ക്ലൗഡ് സേവനങ്ങളിലെ തകരാര്‍ ഒമാനിലെ വിമാനത്താവളങ്ങളുടെ പ്രവര്‍ത്തനത്തേയും സാരമായി ബാധിച്ചു. ഓൺലൈൻ ചെക്ക്-ഇന്‍ നടപടികള്‍ മുടങ്ങിയതോടെ വിമാനത്താവളങ്ങളിലെ ചെക്ക്-ഇന്‍ നടപടികള്‍ മാന്വല്‍ രീതിയിലേക്ക് മാറ്റി. ഇതോടെ രാജ്യതലസ്ഥാനമായ മസ്കത്തിലെ വിമാനത്താവളത്തിൽ കനത്ത തിരക്കാണ് അനുഭവപ്പെടുന്നത്. നടപടികൾ മെല്ലെ നടക്കുന്നതിനാൽ വിമാനങ്ങൾ വൈകുകയാണ്.

കമ്പ്യൂട്ടറുകൾ നിശ്ചലമായതോടെ എഴുതി തയ്യാറാക്കിയ ബോര്‍ഡിങ് പാസാണ് വിമാനക്കമ്പനികള്‍ യാത്രക്കാര്‍ക്ക് നൽകുന്നത്. യാത്രക്കാരന്റെ പേരും യാത്ര ആരംഭിക്കുന്ന സ്ഥലവും പോകേണ്ട സ്ഥലവുമുള്‍പ്പെടെയുള്ള കാര്യങ്ങൾ ബോര്‍ഡിങ് പാസില്‍ എഴുതി നല്‍കുകയാണ്. വിമാനനമ്പര്‍, സീറ്റ് നമ്പര്‍, ബോര്‍ഡിങ് സമയം തുടങ്ങിയവയും എഴുതി നൽകുകയാണ്. 

തങ്ങളുടെ ഓണ്‍ലൈന്‍ സേവനങ്ങള്‍ തടസ്സപ്പെട്ടുവെന്നും പ്രശ്‌നംപരിഹരിക്കാന്‍ ശ്രമം തുടരുകയാണെന്നും വിവിധ വിമാനക്കമ്പനികള്‍ അറിയിച്ചു. മൈക്രോസോഫ്റ്റ് വിൻഡോസ് അപ്രതീക്ഷിതമായി പണിമുടക്കിയതോടെ ലോകമാകെയുള്ള കമ്പ്യൂട്ടർ വഴിയുള്ള സേവനങ്ങൾ നിശ്ചലമായി. ഇന്ത്യയിൽ ഉൾപ്പെടെ ലോകത്തിന്റെ വിവിധ ഭാഗങ്ങളിൽ വിമാന സര്‍വിസുകള്‍, ബാങ്കുകള്‍, മാധ്യമസ്ഥാപനങ്ങള്‍, ഐടി സ്ഥാപനങ്ങൾ തുടങ്ങിയവയുടെ പ്രവര്‍ത്തനം പണിമുടക്കിയിട്ടുണ്ട്. ഇവയ്ക്ക് പുറമെ ലക്ഷക്കണക്കിന് ഉപയോക്താക്കൾക്കാണ് സേവനം തടസപ്പെടുന്നത്.