വയനാട്: മുണ്ടക്കൈ ഉരുള്‍പൊട്ടലില്‍ മരണസംഖ്യ ഇനിയും ഉയരാന്‍ സാധ്യതയെന്ന് അധികൃതര്‍. മരിച്ചവരുടെ എണ്ണം 264 കടന്നു. 78 മൃതദേഹങ്ങള്‍ വിട്ടുനല്‍കി. 193 പേരെ കാണാനില്ലെന്നാണ് വിവരം ലഭിക്കുന്നത്. ജെസിബി ഉപയോഗിച്ച് ഇന്നും തിരച്ചില്‍ തുടരും.

കെട്ടിടാവശിഷ്ടങ്ങള്‍ക്കിടയിലും മണ്ണിനടിയിലുമെല്ലാം തിരച്ചില്‍ തുടരുന്നുണ്ട്. കിട്ടിയ മൃതദേഹങ്ങളാണെങ്കില്‍ തിരിച്ചറിയാന്‍ പറ്റാത്ത നിലയിലുമാണ്. ജനിതക പരിശോധനകള്‍ ആരംഭിച്ചതായും അധികൃതര്‍ പറഞ്ഞു. നിരവധി ആശുപത്രികളില്‍ ഗുരുതരാവസ്ഥയില്‍ രോഗികളുണ്ട്. 82 ദുരിതാശ്വാസ ക്യാംപുകളിലായി 8304 പേരാണ് ഉള്ളത്.

അതുപോലെ പാലത്തിന്റെ നിര്‍മാണം അവസാനഘട്ടത്തിലാണ്. ബെയിലി പാലം പണി പൂര്‍ത്തിയായാല്‍ രക്ഷാപ്രവര്‍ത്തനം വേഗത്തിലാവുമെന്നാണ് പ്രതീക്ഷിക്കുന്നത്. മുഖ്യമന്ത്രിയും രാഹുല്‍ ഗാന്ധിയും പ്രിയങ്കാഗാന്ധിയുമൊക്കെ ഇന്ന് വയനാട്ടിലെത്തും. രാവിലെ കലക്ടറേറ്റില്‍ സര്‍വകക്ഷിയോഗവും നടക്കും.