തിരുവനന്തപുരം വിമാനത്താവളത്തിന് ശേഷം കേരളത്തിൽ നിന്ന് കോഴിക്കോട് വിമാനത്താവളം കൂടി സ്വകാര്യവൽക്കരിക്കുന്നതിനുള്ള നീക്കം കേന്ദ്രവ്യോമയാന മന്ത്രാലയം സജീവമായി പരിഗണണിക്കുന്നു.  അദാനി ഗ്രൂപ്പ് ഉൾപ്പടെയുള്ള കമ്പനികൾ വിമാനത്താവളം ഏറ്റെടുക്കാനായി തയ്യാറെടുക്കുന്നുണ്ട്. അദാനി ഗ്രൂപ്പ് എയർപോർട്ട് അതോരിറ്റി ഓഫ് ഇന്ത്യയുടെ കീഴിലുള്ള കൂടുതൽ വിമാനത്താവളങ്ങൾ ഏറ്റെടുക്കാൻ ശ്രമിക്കുമെന്ന് ലോക്‌സഭാ തെരഞ്ഞെടുപ്പിന് മുമ്പ് തന്നെ വ്യക്തമാക്കിയിരുന്നു. എം.കെ.രാഘവൻ എം.പി കോഴിക്കോട് വിമാനത്താവളത്തിൻ്റെ സ്വകാര്യവൽക്കരണം അടുത്ത വർഷമുണ്ടാകുമെന്ന് മലബാർ ചേംബർ ഓഫ് കോമേഴ്‌സ് കോഴിക്കോട്ട് സംഘടിപ്പിച്ച ഒരു ചടങ്ങിൽ അറിയിച്ചിരുന്നു.

എയർപോർട്ട് അതോരിറ്റിയുടെ കീഴിൽ വിവിധ സംസ്ഥാനങ്ങളിലുള്ള 25 വിമാനത്താവളങ്ങൾ ഘട്ടം ഘട്ടമായി സ്വകാര്യവൽക്കരിക്കുമെന്നാണ് പറയുന്നത്. കോഴിക്കോടിന് പുറമെ ചെന്നൈ, വിജയവാഡ, വഡോദര, ഭോപ്പാൽ, തിരുപ്പതി, ഹുബ്ലി, ഇംഫാൽ, അഗർത്തല, ഉദയ്‌പൂർ, ഡെറാഡൂൺ, ഭുവനേശ്വർ, വാരണാസി, അമൃത്സർ, തിരുച്ചിറപ്പള്ളി, ഇൻഡോർ, റായ്‌പൂർ, കോയമ്പത്തൂർ, നാഗ്‌പൂർ, പറ്റ്‌ന, മഥുര, സൂറത്ത്, റാഞ്ചി, ജോധ്‌പൂർ, രാജമുണ്ട്രി എന്നീ വിമാനത്താവളങ്ങളാണ് കേന്ദ്രസർക്കാരിൻ്റെ സ്വകാര്യവൽക്കരണ പട്ടികയിലുള്ളത്. 

കോഴിക്കോട് വിമാനത്താവളത്തിന്റെ സ്വകാര്യവൽക്കരണം രണ്ടാം ഘട്ടത്തിലായിരിക്കുമെന്നാണ് സുചന. സംസ്ഥാന സർക്കാരിന് കൂടി പങ്കാളിത്തമുള്ള വിമാനത്താവളത്തിൽ നിലവിൽ ഒട്ടേറെ വികസന പ്രവർത്തനങ്ങൾ നടന്നു വരികയാണ്. ഈ സാഹചര്യത്തിൽ വിമാനത്താവളം ഏറ്റെടുക്കാൻ സ്വകാര്യ കമ്പനികൾ മുന്നോട്ടു വന്നേക്കില്ല. സർക്കാർ ഫണ്ടുപയോഗിച്ച് വികസന പ്രവൃത്തികൾ പൂർത്തിയാകുമ്പോൾ മാത്രമായിരിക്കും കമ്പനികൾ താൽപര്യം പ്രകടിപ്പിക്കുക.

അതേസമയം തെരഞടുപ്പിനു ശേഷം വകുപ്പു വിഭജനത്തിൽ ഘടകകക്ഷിയായ തെലുങ്ക് ദേശം പാർട്ടിക്കാണ് വ്യോമയാന മന്ത്രാലയത്തിൻ്റെ ചുമതല ലഭിച്ചത്. ഇതോടെ നയപരമായ കാര്യങ്ങളിൽ മാറ്റങ്ങൾക്കുള്ള സാധ്യതയേറി. ഈ മാറ്റം സ്വകാര്യവൽക്കരണ തീരുമാനങ്ങളെ സ്വാധീനിക്കുമെന്നാണ് വിലയിരുത്തപ്പെടുന്നത്.