ഗസ്സ: ഗസ്സ സിറ്റിയില്‍ അഭയാര്‍ഥി ക്യാംപായി പ്രവര്‍ത്തിച്ച സ്‌കൂളിന് നേരെ നടന്ന ആക്രമണത്തില്‍ 30 മരണം.  ഹസന്‍ സലാമ, അല്‍-നാസര്‍ സ്‌കൂളുകളിലെ ഇരകളില്‍ 80 ശതമാനവും കുട്ടികളാണെന്ന് രക്ഷാപ്രവര്‍ത്തകര്‍ പറഞ്ഞു. വെസ്റ്റ് ബാങ്കില്‍ രണ്ടു ആക്രമണങ്ങളിലായി 9 പേരെയും ഇസ്‌റാഈല്‍ സേന കൊലപ്പെടുത്തിയിരുന്നു. ഇതിൽ ഹമാസിന്റെ പ്രാദേശിക കമാന്‍ഡര്‍ കൊല്ലപ്പെട്ടതായി ഹമാസ് സ്ഥിരീകരിച്ചു. ഗസ്സ സിറ്റിയിലെ ഷെയ്ഖ് റദ്‌വാന്‍ മേഖലയിലെ സ്‌കൂളിന് നേരെയാണ് ഇസ്‌റാഈല്‍ സേന ആക്രമണം നടത്തിയത്. ഹമാസിന്റെ കമാന്‍ഡ് സെന്ററായി പ്രവര്‍ത്തിച്ച സ്‌കൂളാണ് തകര്‍ത്തതെന്നാണ് ഇസ്‌റാഈല്‍ സേനയുടെ അവകാശവാദം. എന്നാല്‍ സ്‌കൂള്‍ ദുരിതാശ്വാസ കേന്ദ്രമായിരുന്നുവെന്ന് ഫലസ്തീന്‍ ഉദ്യോഗസ്ഥര്‍ പറഞ്ഞു.

വെസ്റ്റ്ബാങ്കില്‍ തുല്‍കറം പട്ടണത്തിനു സമീപം ആണ് ആദ്യത്തെ വ്യോമാക്രമണം നടന്നത്. തുല്‍കറം ബ്രിഗേഡുകളാണ് കൊല്ലപ്പെട്ടതെന്ന് ഹമാസും പറഞ്ഞു. എന്നാല്‍ കൊല്ലപ്പെട്ടവരില്‍ നാലു പേര്‍ സാധാരണക്കാരാണെന്ന് ഫലസ്തീന്‍ ഇസ്‌ലാമിക് ജിഹാദിൻ്റെ വാദം. മണിക്കൂറുകള്‍ക്ക് ശേഷമാണ് ഇവിടെ രണ്ടാമത്തെ വ്യോമാക്രമണം നടന്നത്.

ഫലസ്തീന്‍ വാര്‍ത്താ ഏജന്‍സിയായ വഫയുടെ റിപ്പോര്‍ട്ട് പ്രകാരം നാലുപേരാണ് കൊല്ലപ്പെട്ടത്. എന്നാല്‍ ഹമാസിന്റെ കണക്ക് പ്രകാരം മരണം 9 ആണ്. വെസ്റ്റ്ബാങ്കില്‍ ഫലസ്തീനികള്‍ക്കെതിരേ ആക്രമണം ഇസ്‌റാഈല്‍ ശക്തിപ്പെടുത്തിയതിനു പിന്നാലെ ഇസ്‌റാഈലുകാര്‍ക്കെതിരേയുള്ള ആക്രമണങ്ങളും ശക്തമായിട്ടുണ്ട്. https://www.suprabhaatham.com/readmore?tag=Gaza