തെഹ്റാൻ: ഹമാസിന്റെ രാഷ്ട്രീയകാര്യ സമിതി നേതാവായിരുന്ന​ ഇസ്മാഈൽ ഹനിയ്യയെ കൊലപ്പെടുത്തിയതിന് പിന്നാലെ തിരിച്ചടിയിൽ ഭയന്ന് ഇസ്‌റാഈൽ. തിരിച്ചടിയുണ്ടാകുമെന്ന ആശങ്കയെ തുടർന്ന് അമേരിക്കയോടും യൂറോപ്യൻ രാജ്യങ്ങളോടും ഇസ്‌റാഈൽ സഹായം ആവശ്യപ്പെട്ടു. പ്രതിരോധ സഹായവും പിന്തുണയും വേണമെന്ന ആവശ്യം ഉന്നയിച്ചതായി വിദേശം മാധ്യമങ്ങൾ റിപ്പോർട്ട് ചെയ്തു.

ഇസ്മാഈൽ ഹനിയ്യയുടെ കൊലപാതത്തിൽ തിരിച്ചടിയിൽ നിന്ന് പിറകോട്ടില്ലെന്നാവർത്തിക്കുകയാണ് ഇറാൻ. തങ്ങളുടെ രാജ്യത്തിന്റെ പരമാധികാരം മറികടന്നുള്ള ആക്രമണമാണ് ഇസ്‌റാഈൽ നടത്തിയതെന്നാണ് വിലയിരുത്തൽ. അതിനാൽ തന്നെ തിരിച്ചടിയുണ്ടാകും എന്ന നിലപാടിലാണ് ഇറാൻ. പിന്മാറണമെന്ന് അമേരിക്കൻ അഭ്യർഥനയും ഇറാൻ തള്ളിയിട്ടുണ്ട്.

ഇറാന് പുറമെ ഹമാസിന്റെയും ഹിസ്ബുല്ലയുടെയും തിരിച്ചടിയും ഇസ്രാഈലിനെ ഭയത്തിലാഴ്ത്തിയിട്ടുണ്ട്. ഹിസ്ബുല്ലയും ഹൂതികളും ഹമാസും ചേർന്നുള്ള സംയുക്ത ആക്രമണത്തിനും സാധ്യത കല്പിക്കുന്നുണ്ട്. നെതന്യാഹു ഉൾപ്പെടെയുള്ള നേതാക്കളുടെ സുരക്ഷയ്ക്കായി ഇസ്‌റാഈൽ ഭൂഗർഭ അറകൾ ഒരുക്കിയതായി പ്രാദേശിക മാധ്യമങ്ങൾ റിപ്പോർട്ട്​ ചെയ്തു. തെൽ അവീവ് കനത്ത സുരക്ഷിയിലാണ്.

ലബനാൻ അതിർത്തി മേഖലകളിൽ താമസിക്കുന്ന ജനങ്ങളോട് വീടുകളിൽ നിന്ന്​ പുറത്തിറങ്ങരുതെന്നും സൈന്യം ആവശ്യപ്പെട്ടു. ലബനാനിൽ നിന്ന് കൂടുതൽ രാജ്യങ്ങൾ പൗരന്മാരെ ഒഴിപ്പിച്ചു തുടങ്ങിയിട്ടുണ്ട്. അടിയന്തരമായി ലബനാൻ വിടാൻ അമേരിക്കയ്ക്കു പിന്നാലെ ബ്രിട്ടനും തുർക്കിയും തങ്ങളുടെ പൗരൻമാരോട്​ ആവശ്യപ്പെട്ടു.

Following the assassination of Hamas political leader Ismail Haniyeh, Israel has sought assistance from the US and European nations, fearing retaliation